Dźeń wotewrjenych duri w dźěłarni za zbrašenych přewjedli
Wojerecy (AK/SN). Na přichod su Wojerowske łužiske dźěłarnje za zbrašenych ludźi derje přihotowane. Tuchwilu maja tam dosć nadawkow, štož podšmórny jednaćel Eckhart Friese minjenu sobotu na dnju wotewrjenych duri. W dźěłarnjach skutkuje něhdźe 450 ludźi, w spěchowanskim a powołanskowukubłanskim wobłuku, w ćišćerni, porjedźerni kolesow, blidarni, płokarni, zahrodnistwje, w industrijowej montaži kaž tež w zawodach na Horach a w Narću. 110 sobudźěłaćerjow so wo zbrašenych stara. K dźěłarnjam słušeja na wjacorych městnach bydlenja ze wšelakimi bydlenskimi formami. „Wosebje wažne je nam samostatnosć zbrašenych spěchować“, wuzběhny sobudźěłaćerka Caroline Rudolph. Wšědny dźeń wšak by sej wona wjace wotewrjenosće, zajima a hódnoćenja towaršnosće za swědomite dźěło ze zbrašenymi přała.
