Chorownje w Hornjej Łužicy na přiběracu ličbu schorjenych přihotowane

Kamjenc/Budyšin/Wojerecy (SN/BŠe/jak). Chorownje w Budyskim wokrjesu su mjeztym jara derje na stupacu ličbu pacientow coronawirusa nastajene. Před nuzowej staciju Kamjenskeje chorownje maltezow swj. Jana steji nětko stan. Kaž wottam rěka, je to izolowana čakanska stacija za podhladne schorjene wosoby ze symptomami. Lěkowanje tam žane předwidźane njeje. Pacienća, kotřiž maja so w chorowni lěkować, dyrbja tam čakać, doniž jich na izolowansku staciju w domje njedowjezu. Personal je škitnu drastu woblečeny, zo njeby so natyknył. „Team medicinarjow, kotřiž so wšědnje z aktualnymi dopóznaćemi lěkowanja wirusa zaběraja, so wo pacientow stara“, zdźěli jednaćel Kamjenskeje chorownje maltezow Sven Heise. Pod nuzowej staciju chorownje je izolowanska stacija zarjadowana, a puć k njej je jasnje woznamjenjeny. Kapacitu stacije po potrjebje přiměrja. Na schodźenku dwaj pandemijoweho plana maja městno za 35 izolowanych pacientow. Wosoby ze snadnymi symptomami sćelu do domjaceje karanteny.