Budyšin/Pěrno (SN/bn). „Mammamobil“ je tajke něšto kaž radiologiska praksa a zdobom labor na kolesach. Jězdźidła wudospołnjeja stacionarne přepytowanja hrudźe k zažnemu spóznawanju nadroweho raka, kotrež žonam w starobje 50 do 69 lět we wobłuku wot zwjazkoweho knježerstwa wobzamknjeneho programa na zakładźe europskich směrnicow wot 2002 kóžde druhe lěto poskićeja.
We wuchodnej Sakskej dojědźe sej mobil mjez druhim do Niskeje, Běłeje Wody a Žitawy. Dźensa kónči so třiměsačny přebytk na Budyskim Třělnišću, wot póndźele změja pacientki we Wjelećinje móžnosć so přepytować dać. Wotpowědne přeprošenja je zamołwita centrala w Kamjenicy hižo rozesłała. W padźe, zo tajke dóšło njeje, móža so žony na stronje www.mammotermin.de přizjewić. Na portalu nimo toho wuzběhuja, zo njeje tak mjenowany mamografiski screening winowatostny, přiwšěm přepytowanja doraznje doporučeja.