Drježdźany (SN). W Sakskej pobrachuje hižo nětko wjele domjacych lěkarjow, předewšěm we wjesnych kónčinach. Naje­bać to, zo je wjele zajimcow za studij mediciny, wukubłanske kapacity w Němskej njedosahaja, zo móhli wšitkim abiturientam, kotřiž chcyli so z lěkarjom stać, studij zmóžnić. Tohodla je sakske zjednoćenstwo chorobnych kasow (KV) modelowy projekt wuwiło. Pod hesłom „Studować w Europje – přichod w Sakskej“ chcedźa zajimcam přistup na uniwersitu w madźarskim měsće Pécs zmóžnić, zo bychu tam humanu medicinu studowali. Za čas regularneho studija jim studijne popłatki spušća. Po studiju absolwuja wobdźělnicy dalekubłanje na fachoweho lěkarja za powšitkownu medicinu w Sakskej. Pozdźišo zasadźa jich znajmjeńša pjeć lět w praksach domjacych lěkarjow, ale zwonka Lipska/Markkleeberga a Drježdźan/Radebeula. Zo móhli sej dźěło domjaceho lěkarja zbližić, maja studowacy praksu za partnera, hdźež wob lěto dwanaće dnjow hospituja.