„Posłuchaj lěkarja, prjed hač jeho ­trjebaš!“, serbske přisłowo namołwja.

Tuž wěnuje so student mediciny ­Pětr Dźisławk znatym a mjenje znatym chorosćam, zo by je ­čitarjam trochu ­bliže rozłožował (53).

Krej je transportna a regulaciska kapalina, bjez kotrejež njeby žiwjenje móžne było. Něhdźe pjeć do šěsć litrow kreje dorosćeny čłowjek ma. Hrubje so praji, zo móže połdra litra zhubić, prjed hač je žiwjenje akutnje wohrožene. Potom pak je nuza wulka. Medicina dźensa hižo wjele zdokonja, tola čłowječu krej z někajkej kumštnej substancu narunać njeje móžno. Tuž ma so ludźom, kotřiž su wulke mnóstwa kreje zhubili, tak spěšnje kaž móžno cuza krej dawać. To mjenujemy transfuziju kreje. Něhdźe štyri miliony transfuzijow w Němskej wob lěto přewjeduja. W jednym tajkim měšku za transfuziju je přerěznje něhdźe 300 mililitrow kreje respektiwnje wobstatkow kreje. Móžemy sej potajkim wuličić, zo je za zdźerženje tutoho systema wulke mnóstwo darjeneje kreje trěbne.