Poskića kurs čěšćiny
Budyšin. Štóž ma zajim na rěčnym kursu čěšćiny wot 20. julija do 17. awgusta w Praze abo wot 13. awgusta do 4. septembra w Českich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda. (Póstowe naměsto 2, 02625 Budyšin, e-mail: ). Wotpowědny formular a dokładne informacije su na internetnej stronje www.witaj-sprachzentrum.de pod „rěčne kursy – čěšćina“ přistupne.
Pomhaja darmotnje
Kamjenc. We wobłuku cyłoněmskeje iniciatiwy „Lěwica pomha“ poskićuje měšćanski zwjazk Lěwicy Kamjenc-Radeberg wotnětka stajnje štwórtk wot 14 do 18 hodź. darmotne poradźowanje. Wone wotměje so na Budyskej dróze 8 w Kamjencu. Štóž wysokich wudawkow za milinu a płun abo bjezdźěłnosće dla pomoc trjeba abo štóž chce wědźeć, kotre móžnosće podpěry eksistuja abo štóž trjeba pomoc při wupjelnjenju formularow je wutrobnje witany. Nadrobniše informacije podadźa sobudźěłaćerjo pod telefonowym čisłom 03578/ 21 42 669.
Płuwać wuknyć
Budyšin. Zakładny płuwanski kurs poskićuja w zymskich prózdninach wot 13. do 21. februara w Budyskej Röhrscheidtowej kupjeli. W tym času wobdźělnicy wšědnje wot 8.30 hač do 10 hodź. zwučuja. Wobdźělenje na wosobu płaći 160 eurow. Přizjewjenja přijimuje personal kupjele wosobinsce abo e-mailnje pod .
Nominuja kandidata
Łaz. Zjawna sobustawska zhromadźizna CDU k nastajneju kandidata za wólby Łazowskeho wjesnjanosty wotměje so jutře, štwórtk, w 19 hodź. w Lěsnym hosćencu při Slěbornym jězoru w Bjedrichecach (Friedersdorf).
Radźićeljo wuradźuja
Róžant. Předstajenje přizwoleneje twarskeje naprawy a doby realizowanja nowotwara Ralbičanskeje pěstowarnje budźe jedna z temow přichodneho posedźenja gmejnskeje rady Ralbicy-Róžant štwórtk, 19. januara, we 18.30 hodź. w sydarni gmejnskeho zarjada w Róžeńće. Dale póńdźe wo busowe zastanišćo w Hrańcy a wo popłatki za Ralbičansku sportownju.
Na popołdnjo za swójby
Budyšin. „Barby rejuja!“ rěka hesło popołdnja za swójby, na kotrež přeproša Budyski Serbski muzej njedźelu, 22. januara. Zarjadowanje wotměje so we wobłuku wuměłskeje wustajeńcy „Wšo je krajina. Serbski moler Jan Buk“. Wot 15 hodź. čaka na wopytowarjow wotměnjawy program. Zajimcy budu so móc po wustajeńcy wodźić dać, mały pokład pytać, so z wuměłskim paslenjom k temje mozaik zaběrać a rejwać. Štóž ma lóšt, njech sej drastu ze swojej najlubšej barbu zwoblěka, přetož hesło rěka „Barby rejuja“.
Pytaja rjemjeslnikow
Próstwu wo baru zapodać
Porěči wo putnikowanju
Chrósćicy. Lutherowy putniski puć steji w srjedźišću přichodneho zarjadowanja kulturneje zymy sobotu, 14. januara, w 19.45 hodź. w Chróšćanskej putniskej hospodźe. Putniski puć bu 2017 wotewrjeny. Wón ćehnje so mjez Wormsom a Eisenachom a je něhdźe 400 kilometrow dołhi. Historiski pozadk je pućowanje Luthera 1521 z Wittenberga k Reichstagej we Wormsu a wróćo, hdźež so potom za dlěši čas w hrodźe Wartburg schowa. Putnica Friedeborg Seitz z Mannheima je pěši po tymle Lutherowym puću pućowała a sobotu w Chróšćanskej putniskej hospodźe wo swojich dožiwjenjach a impresijach rozprawja. Na přednošk w němskej rěči su wšitcy zajimcy lubje witani.
Rabiner budźe z hosćom
Za rozmołwu so přizjewić
Traktory so zetkaja
Hora. Lubowarjo starych traktorow njech njeskomdźa jutře, sobotu, zetkanje wlečakow na Horje w Bóščanskej gmejnje. Wot 10 hodź. wobsedźerjo ze swojimi mašinami přijědu. Cyły dźeń móža sej zajimcy historisku techniku wobhladać. Wo ćělne derjeměće budźe wězo postarane.
Přednošuje wo holi
Kamjenc. Wo wuwiću přirody Kinsporskeje hole přednošuje Dirk Synatzschke wutoru, 10. januara, w 19 hodź. w elementariju Kamjenskeho Muzeja zapadneje Łužicy. Při tym póńdźe wo to, kak je so bywše wojerske zwučowanišćo pod škitom přirody změniło.
Přewjedu dny rozpominanja
Přednošk wo putnikowanju
Chrósćicy. Putnikowanje do Krupki steji w srjedźišću dalšeho wječora kulturneje zymy w Chróšćanskej putniskej hospodźe, a to sobotu, 7. januara, w 19.45 hodź. Kóždolětnje w awgusće nastaji so skupina serbskich młodostnych z Chrósćic na tři dny trajacy puć pěši. Njehladajo na mozle dyrbi to měć fascinowacu přićahliwosć, dokelž mjeztym su dalše generacije młodostnych tutu tradiciju přewzali, a „starše semestry“ jako ekstra skupina dorosćenych paralelnje do Krupki a wróćo běža. Wo putnikowanju do Krupki powědaja a pokazaja wobrazy Marcel Hoza, Diana Wowčerjowa a Bosco Hojer. Zajimcy su wutrobnje witani.
„Maschine“ signuje nowu CDju
Budyšin. Spěwar 2016 rozpušćeneje kapały Puhdys Dieter „Maschine“ Birr budźe jutře, štwórtk, wot 12 hodź. z hosćom w Budyskim předawanišću za techniske nastroje Medimax w Centeru na Žitnych wikach. Tam su wšitcy přeprošeni sej jeho nowu CD „Große Herzen“ signować dać a so ze spěwarjom rozmołwjeć.
Zakónča wustajeńcu
Budyšin. Wosebita wustajeńca „Wuměłstwo za zběranje a darowanje“ w Galeriji Budissin je hišće hač do pjatka, 6. januara, přistupna. Přehladka Budyskeho wuměłstwoweho towarstwa prezentuje na přikład fotografije, skulptury, mólby a asemblaže mjez druhim Iris Brankačkoweje, Isy Bryccyneje, Andreasa Henniga, Eberharda Petersa a Ingi A. Seidel. Galerija je wot wutory do soboty wot 14 do 18 hodź. wotewrjena.
ZSW pokročuje z rjadom
Budyšin. We wobłuku swojeho literarneho rjadu „tracTare“ wěnuje so Zwjazk serbskich wuměłcow pjatk, 6. januara, we 18 hodź. tekstam młodych awtorow z najnowšeho zešiwka „Paternoster 9“. Zešiwk je loni w LND wušoł. Prof. Dietrich Šołta poda z recensiju zawod do bjesadneho koła wo twórbach w Budyskej Röhrscheidtowej bašće. Wšitcy zajimcy kaž tež awtorki a awtorojo su wutrobnje přeprošeni.
Proša wo podpěru
