Putnikować po domiznje
Chrósćicy. Dźiwadźelnikaj Sylvia Burza a Matthias Greupner z Lubnjowa a Choćebuza staj hižo loni we wobłuku Kulturneje zymy w Chrósćicach wo Jakubowym puću rozprawjałoj. Tehdy wopytowarjo zhonichu, kak dožiwištaj putnikowanje mjez Zhorjelcom a španiskim Santiago de Compostela. Tola pućowanje wobeju putnikow je wosrjedź puća tež hišće raz do cyle hinašeho směra wjedło. Při tym dźěše hišće raz wróćo do domizny, přetož Sylvia Burza a Matthias Greupner staj tež po Via Baltica w sewjeru republiki nóžkowałoj. Za jutře, sobotu, staj wo putniskej čarje, kotraž je hišće nimale njeznata, wobrazy a lóštne stawiznički sobu přinjesłoj. Tak sćěhujće tola dalši raz łužiskemu putniskemu porikej na jeho Jakubowym puću. Wječor započnje so w 19.45 hodź. Hižo do toho so w 16 hodź serbske dźěćace kino poskićuje. Tónraz pokaza so film „Mała wjera“.
Zahraje na pišćelach
Počesća Jakuba Skalu
Budyšin. Towarstwo Cyrila a Metoda, Maćica Serbska a Budyska wosada přeprošuja wutrobnje na wosebity nyšpor njedźelu, 19. januara, w 14 hodź. składnostnje 100. posmjertnin něhdyšeho kanonika Budyskeho tachantstwa a předsydy Maćicy Serbskeje Jakuba Skale, do Budyskeje tachantskeje cyrkwje. Po krótkim počesćenju při jeho rowje na Mikławšku přizamknje so bjesada z kofejom na Budyskej farje.
Na nowolětne přijeće
Wojerecy. Swobodne wolerske zjednoćenstwo Měšćanski přichod Wojerecy přeprošuje wšitkich wobydlerjow na nowolětne přijeće sobotu, 18. januara, wot 8 do 12 hodź. na Wojerowske Łužiske naměsto. Zajimcy móža so tam wo aktualnych temach a ćežišćach zjednoćenstwa informować a so z jeho čłonami rozmołwjeć. Wo napoje su so postarali.
Rěčna hodźina zapósłanče
Joachim Mič přednošuje
Łaz. Spěchowanske towarstwo Zetkanišćo Dom Zejlerja a Smolerja we Łazu přeprošuje hromadźe z rěčnym motiwatorom Frankom Knoblochom na swětłowobrazowy přednošk Joachim Miča. Zarjadowanje wotměje so pjatk, 17. januara, we 18 hodź. w sydarni Łazowskeho gmejnskeho zarjadnistwa. Sulšečan porěči wo swojim putnikowanju po Jakubowym puću přez sewjernu Španisku a prezentuje k tomu swoju nowu knihu. Wšitcy zajimcy su wutrobnje přeprošeni.
Radźićeljo wuradźuja
Worklecy. Projekt saněrowanja Serbskeje wyšeje šule „Michał Hórnik“ Worklecy předstaja na přichodnym zjawnym posedźenju Worklečanskeje gmejnskeje rady, kotrež wotměje so jutře, srjedu, we 18.30 hodź. w tamnišej šuli. Na dnjowym porjedźe radźićelow steji dale diskusija wo psyčich dawkach.
Radwor. W samsnym času, potajkim jutře wot 18.30 hodź. zeńdźe so Radworska gmejnska rada w sydarni gmejnskeho zarjadnistwa. Mjez druhim póńdźe wo financowanje katolskeho dźěćaceho domu „Alojs Andricki“. Nimo toho chcedźa problem muchow w Drobach wospjet tematizować.
Serbski organist zahudźi
Radźićeljo wuradźuja
Pančicy-Kukow. Přichodna zjawna zhromadźizna zarjadniskeho zwjazka Při Klóšterskej wodźe wotměje so jutře, 14. januara, w 19 hodź. w sydarni zarjadniskeho zwjazka w Pančicach-Kukowje. Na dnjowym porjedźe stejitej mjez druhim hospodarski plan 2025 a přistup k zaměrowemu zwjazkej Komunalne předźěłanje informacijow Sakska.
Přihotuja wustajeńcu
Radwor. Spěchowanski kruh za serbsku ludowu kulturu a Dwórnišćo inkluzije Radwor přihotujetej tuchwilu wuměłsku wustajeńcu. Pod hesłom „Dwórnišćo pisanosće“ wotewru pjatk, 17. januara, w 17 hodź. přehladku na něhdyšim dwórnišću w Radworju. Wot 16 hodź. su zajimcy na kofej přeprošeni. Po tym je składnosć sej ekspoziciju wobhladać. Twórby dorostowych kaž tež nazhonitych lajskich wuměłcow z cyłeje Łužicy pokazuja widy na Radwor, kiž su w lěću 2023 na kónctydźenskej dźěłarničce pod nawodom Maje Nagloweje we wsy nastali.
Zetkaja so na nowym městnje
Kak dale z domom?
Njechorń. Domowinska župa „Jan Arnošt Smoler“ přeprošuje wšitkich zajimcow dźensa, pjatk, w 19 hodź. do Domu Měrćina Nowaka-Njechorńskeho na rozmołwu. W srjedźišću ma prašenje stać, kak ma z domom dale hić.
W Delanach do šule pohladać
Ralbicy. Serbska wyša šula Ralbicy přewjedźe wutoru, 14. januara, dźeń wotewrjenych duri. Dopołdnja wopytaja šulerjo wokolnych šulow kubłanišćo. Wuknjacy z wučerkami a wučerjemi jim swoju šulu předstajia, jim wopyt wučby zmóžnja a wo cyłodnjowskich poskitkach informuja. Wot 17 do 19 hodź. su wšitcy zajimcy přeprošeni sej šulu wobhladać. Za staršich přichodneho 5. lětnika zarjaduja we 18 hodź. wosebite informaciske zarjadowanje na 1. poschodźe.
... a tež w sprjewinym měsće
Budyšin. Hižo dźeń do Ralbičanskeje wyšeje šule přewjedźe Serbska wyša šula Budyšin dźeń wotewrjenych duri, potajkim póndźelu, 13. januara. Wot 15.30 do 18 hodź. móža zajimcy kubłanišćo wopytać, so z wučerkami a wučerjemi rozmołwjeć a so wo šulskim žiwjenju na Friedricha Listowej dróze 8 informować.
Qigong bliže zeznać
Wustajeńca přistupna
Hirschfelde. W putniskej hospodźe w Hirschfeldźe su hač do swjedźenja Předstajenja Knjeza, pjatk, 2. februara, Bože narodki wustajene. Wustajeńca je jeničce z wodźenjom přistupna. Tajke poskićuja kóždu sobotu w 14 hodź. Snadneje wulkosće domu dla měli so zajimcy na kóždy pad přizjewić. Ale tež wosebite wodźenja za skupiny z minimalnje sydom wosobami su móžne. Zajimcy měli so telefonisce z Jeannette Gosteli dojednać, a to z mejlku na abo telefonisce pod čisłom 0175 4085997.
Mjenje gratulacijow
Pitna woda dróša
Běła Woda. Něhdźe 25 000 domjacnosćow w Běłej Wodźe a wokolnych gmejnach dyrbi wot noweho lěta za pitnu wodu wjace płaćić. Kubikny meter płaći nětko 1,68 eurow a z tym 20 centow wjace hač do toho. Tež zakładna płaćizna je so powyšiła. Domjacnosć ze štyrjomi wosobami a přetrjebu 120 kubiknych metrow wob lěto dyrbi nětko něhdźe šěsć eurow wob měsac wjace płaćić. Poprawom mějachu płaćizny we wobłuku zaměroweho zwjazka Srjedźna Nysa-Šepc lětsa konstantne wostać. Předsyda zaměroweho zwjazka Jörg Funda wopodstatni zwyšenje z přiběracymi personalnymi kóštami a z wotedawkami za klumpanje dnowneje wody.
Zhromadnje spěwaja
Budyšin. Wšitcy, kotřiž rady spěwaja, su tež w lěće 2025 zaso na zhromadne spěwanje přeprošeni. Kaž Lubina Žurec-Pukačowa w mjenje Zwjazka serbskich spěwarskich towarstwow zdźěli, wotměje so lětuše prěnje spěwne zetkanje jutře, 7. januara, we 18 hodź. w chórowej rumnosći Serbskeho ludoweho ansambla w Budyšinje. Njech lubowarjo serbskeho spěwa w prawje bohatej ličbje přińdu. Terminy dalšich zetkanjow so sčasom wozjewja.
Mandźelskaj putnikowałoj
Wuhotuja hodowny koncert
Chrósćicy. Tradicionalny hodowny koncert Chróšćanskeho cyrkwinskeho chóra wotměje so njedźelu, 5. januara, w 14 hodź. w Chróšćanskej cyrkwi. Mjez druhim jón dźěćacej šoli a dujerjo sobu wuhotuja. Wšitcy zajimcy su na hudźbne popołdnjo přeprošeni.
Bufallo Bill w srjedźišću
Budyšin. Cyle w znamjenju dźiwjeho zapada steji přichodne čitanje Budyskeje akademije póndźelu, 6. januara, we 18 hodź. w Budyskej statnej studijnej akademiji. Bywši marketingowy nawoda Radebeulskeho Karla Mayoweho muzeja a nětko w regionalnym managemenće Leaderoweho regiona skutkowacy André S. Köhler porěči wo tym, kak je w lěće 1906 William F. Cody jako Bufallo Bill ze swojim zabawjenskim předewzaćom w Budyšinje pozastał a tu blisko Sćijec dwójce wobydlerjow zawjeselił.
