Njedawno je Wojerowske měšćanske zarjadnistwo mějićelow domow na Kulowskej dróze w Němcach na gmejnsku žurlu přeprosyło. Chcychu jich wo zakładnym wutwarje statneje dróhi S 95 informować.
Zastupjer Drježdźanskeho projektoweho běrowa Bonk a Herrmann, kotrež hižo druhe nadawki we Wojerecach měješe, přednjese předźěłany plan zakładneho wutwara. Tak ma so 1,19 kilometrow puća w třoch wotrězkach wutwarić. Prěni wotrězk je wjesny započatk ze směra do Kulowa hač k mostej, druhi budźe wot mosta hač k Wincencowej hrjebi a třeći hač k wotbóčce ke Kummelowemu młynej. Plan chcedźa w oktobru w měšćanskej radźe schwalić. Twarić ma so wot februara 2017 hač do junija 2018. Runočasnje z ponowjenjom dróhi nastanjetej potom chódnik a kolesowanski puć. Wopytowarjo informaciskeho zarjadowanja žadachu sej jasnosć wo připłaćenju. K tomu pak nochcychu so měšćanscy zastupjerjo wuprajić. To wězo wobydlerjow njespokoješe, dokelž maja mnozy wulke ležownosće. Měšćanscy zastupjerjo wobydlerjam přilubichu, jich wo dalšich krokach planowanja prawidłownje informować. Achim Nowak
K wobchadnemu pospytej w Budyšinje je wothłós přewažnje pozitiwny. Nimo toho wobsteji přeće, wobchad tež na dalšich městnach na tele wašnje rjadować.
Budyšin (CK/SN). Tuchwilny prowizoriski kružny wobchad na Budyskej Schliebenowej ma so jako trajne rozrisanje porjadnje wutwarić, kaž twarski wuběrk měšćanskeje rady poruča. Po spočatnych mnohich kritiskich hłosach, kotrež mějachu kružny wobchad za přestrašny, jón mjeztym přewažnje pozitiwnje hódnoćeja, praji twarski měšćanosta Peter Hesse. Kružny wobchad je wobchadny prud widźomnje polěpšił – hač na rańši powołanski wobchad, hdyž dochadźa wobstajnje k dołhim rynkam čakacych jězdźidłow. Ale tež hižo do kružneho wobchada dyrbjachu šoferojo na Mosće měra a před nim čakać.
Wustajeńca klankow pola swójby Peto w Nowym Měsće nad Sprjewju je mjeztym zhromadny skutk cyłeje swójby. Štož bě lěta 2009 k zetkanju Nowych Městow jónkrótna ideja dźowki Nicole, swoju zběrku klankow raz zjawnosći pokazać, je mjeztym wjesna atrakcija.
Nowe Město (JoS/SN). Lubowarjo klankow njeměli skomdźić sej přichodne tydźenje do Noweho Města nad Sprjewju dojěć. Pola swójby Peto dožiwja woni njewšědnu přehladku klankow, rozrjadowanu do njeličomnych wobrazow ze znatych a mjenje znatych bajkow. Přihotować započachu ju hižo loni w nowembru, jako rozmyslowachu, kak měła přichodna wustajeńca wupadać, wšako nima kóžde lěto wšitko samsne być. Lětsa su ju hišće raz powjetšili. Pod třěchu pódlanskeho twarjenja nasta dalša rumnosć, kotruž bě přećel Nicole Peto sobu wutwarić pomhał a hdźež je jeje wuj elektriku składł. Z tym pak je wobstejaca twarska substanca wučerpana, přehladku njemóža tuž dale powjetšić.
Po 25 lětach w zastojnstwje su Budyskeho wyšeho měšćanostu Christiana Schramma (CDU) dźensa w Kamjentnym domje oficialnje rozžohnowali. Axel Arlt je so tuž z nim wo němsko-serbskej mjezsobnosći w měsće rozmołwjał.
Što Wam bikulturnosć woznamjenja?
Ch. Schramm: Zhromadne žiwjenje Němcow a Serbow w měsće kaž w regionje njeje jeno přirodne, njeparujomne, ale wulke dobyće, kotrehož njejsmy sej tak wědomi. Wo tym sym dale hłuboko přeswědčeny. Zo wurostuja z toho druhdy konflikty nastupajo popisanje, rěč a dalše, to wšitcy wěmy.
Ćahatej město a Domowina tu za jedyn postronk?
Budyšin (SN/at). Muž bjez předsudkow a wotewrjeny – z tymile słowami su swjedźenscy rěčnicy wjelelětneho Budyskeho wyšeho měšćanostu Christiana Schramma (CDU) charakterizowali. Město Budyšin wuhotowa jemu dźensa w Kamjentnym domje rozžohnowansku swjatočnosć ze zastojnstwa, na kotrejž su so měšćanscy radźićeljo, partnerojo, kolegojo z komunow a wobydlerjo za spomóžne zhromadne dźěło dźakowali.
Twarske dźěła na Wojerowskim wobydlerskim centrumje so nachileja. Wčera je so měšćanska rada z napisami na domje zaběrała a při tym tež stawizniski pozadk wobkedźbowała.
Wojerecy (AK/SN). Wobydlerski centrum Piwarska 1 změje na južnej fasadźe němski a na zapadnej fasadźe serbski napis. Tole je měšćanska rada wčera jednohłósnje wobzamknyła. Napisaj „Bürgerzentrum Braugasse 1“ a „Wobydlerski centrum Piwarska hasa 1“ orientujetej so na historiskim přikładźe a wotpowědujetej němskim kaž serbskim stawiznam domu, w kotrymž běchu 1912 Domowinu załožili. Tež nutřkowny wodźenski system ma dwurěčny być.
Na naměsće před domom ma přichodnje plastika „Rozwiwanje“ Wojerowskeho wuměłca Helge Niegela stać. Iniciatiwu za to měješe Wojerowska kulturna fabrika, kotraž budźe dom wobhospodarjeć. Plastika ma so do skupiny štomow hodźeć, kotrež tam hižo su. Po kritiskej diskusiji radźićeljo tež tomu přihłosowachu, ale z jednym napřećiwnym a jednym wzdatym hłosom.
Nowe mjezwočo pola agentury
Budyšin. Jörg Waniek, nawoda personalneho managementa w koncernje Vattenfall Europe Generation AG w Choćebuzu, je wot dźensnišeho předsyda zarjadniskeho wuběrka Budyskeje dźěłoweje agentury. Zastupowacy předsyda je Bernhard Sonntag, regionalny jednaćel dźěłarniskeho zwjazka DGB wuchodneje Sakskeje, kiž bě dotal předsyda.
Nowe čisło Naša Domowina
Budyšin. XI. mjezynarodny folklorny festiwal, wólby serbskeje rady w Braniborskej, 17. hłowna zhromadźizna Domowiny a lětuši FUEN-kongres su někotre z temow noweho čisła informaciskeho łopjena „Naša Domowina“, kotrež Domowina dźensa na swojej internetnej stronje wozjewi. Abonenća Serbskich Nowin dóstanu Našu Domowinu pjatk, abonenća Noweho Casnika přichodny tydźeń.
Wobjězdka hotowa
Konjecy (DG/SN). Swój zhromadny wjesny swjedźeń wotměchu minjeny kónc tydźenja wobydlerjo Konjec a Šunowa. Po tym zo běchu loni prěni raz w Konjecach swjećili, rozsudźichu so organizatorojo lětsa znowa za dwór towarstwoweho domu Delany.
Z volleyballowym turněrom wjesnych mustwow, kotryž Čórlichec swójba doby, su swjedźeń sobotu popołdnju zahajili. Hrajnišćo při wjesnym hrajkanišću běštej wjesnej towarstwje hakle njedawno ponowiłoj, tak zo bě turněr zdobom premjera noweho volleyballnišća. Wobnowjenje bě tohorunja tema žortneho filma młodźiny, kotryž wječor w bróžni předstajichu. W nim so wjesne kóčki za swój nowy „hajzl“ dźakowachu.
Wjeršk delanskeho wjesneho swjedźenja bě znowa wubědźowanje 13 dobrowólnych wohnjowych woborow. Hladajo na to, zo mustwa dźeń a wjace do swojich mašinow inwestuja a technika zwjetša tež wo wuspěchu a njewuspěchu rozsudźa, běchu w Konjecach wobzamkli, zo wšitcy wohnjowi wobornicy ze samsnej mašinu startuja. Tak mějachu wšitcy nimale samsne wuměnjenja. Dobyli su skónčnje Worklečenjo z 28,05 sekundami před Róžantom a Salowom.