W Domje Měrćina Nowaka w Njechornju je so znowa kruh přećelow doma zetkał. Tamniša Domowinska skupina chce jutrownu a swjatkownu póndźelu wot 14 do 18 hodź. wšitkich zajimcow do domu přeprosyć a wopytowarjow z kofejom a tykancom ­pohosćić. Na njedawnym zarjadowanju běchu sej Trudlu Malinkowu přeprosyli, kotraž z wosobinskich dopomnjenkow ­powědaše, što je so z domom w Njechornju w 1990tych lětach stało. Dr. Betina Kaunowa rozprawješe, kotre móžnosće za ­koncepty w druhich muzejach Sakskeje eksistuja a što móhło so w Njechornju zwoprawdźeć. Foto: Leńka Thomasowa

Krasne nalětnje wjedro je minjenu sobotu 14 ludźi ze Slepoho a wokoliny wužiło a poda so na pućowanje podłu Saksko-Braniborskeje hranicy. Při idyliskim haćiku čitaše jim rěčna motiwatorka projekta ZARI Juliana Kaulfürstowa powědku wo hodernyksu (wódnym mužu tamnišeje kónčiny). Po tym, zo běchu w hajku njedaloko Lěska derje schowane stare swójbne pohrjebnišćo wopytali, měrjachu so zaso wróćo do Slepjanskich stron. W přestawce zakantori Kaulfürstowa spěwaj „Rjana Łužica“ a „Kak stupa so lóštnje a wjesele“, a pućowarjo spěwachu sobu. Na druhim boku notoweho łopjena nańdźechu woni serbske słowa a wobroty, kotrež so tematisce k čarje hodźachu. Čaru bě Hync Rychtaŕ wupytał, kotryž pućowanja wot lěta 2023 zhromadnje z rěčnej motiwatorku přewjeduje. Foto: ZARI/Juliana Kaulfürstowa

Wupućowarjo na jewišću

Budyšin. Němsko-Serbske ludowe dźiwadło hotuje so na prapremjeru lětušeje delnjoserbskeje inscenacije „Pórajśo se wen do swěta“. Hudźbno-sceniska kolaža z pjera Esther Undisz, kotraž zamołwja zdobom režiju, wobswětluje wosud prěnich serbskich wupućowarjow, kotřiž su sej Łužicu wopušćiwši nowu domiznu w Awstralskej a Texasu pytali. Prěnje předstajenje budźe 26. apryla w Hochozy.

Skandal na kubłanskej jězbje

Zhorjelc. Wobraz šulerjow 9. lětnikow ze Zhorjelskeje Wyšeje šule Scultetus, zhotowjeny na kubłanskej jězbje do Auschwitza­, je rozhorjenje wuwabił. Štyrjo šulerjo pokazaja na nim prawicarskoekstremistiski symbol „white power“. Jedyn ze šulerjow je wobraz na Instagramje wozjewił. Nawodnistwo šule je spěšnje reagowało a šulerjow chłostało.

Pytaja wabjenske modele

Budyšin (CRM/SN). Měšćanski muzej Budyšin je njedawno wospjet na koncert mjez wustajenymi eksponatami přeprosył. Hižo wot 12. oktobra zašłeho lěta je w domje při Žitnych wikach reprezentatiwna wosebita wustajeńca z mólbami, grafikami, ilustracijemi a plakatami za dźiwadło a film tworjaceje wuměłče Jutty Mirtschinoweje zarjadowana. Narodźiwši so 1949 w tehdomnišim Karl-Marx-Stadće je wona w Budyšinje wotrostła a na bywšej Rozšěrjenej wyšej šuli Friedrich Schiller maturowała. W Lipsku a Berlinje studowaše wuměłstwo a bě mišterska šu­lerka Wernera Klemke. Pozdźišo přewza rady tohorunja nadawki w Ludowym nakładnistwje Domowina. Prěnička z jeje ilustracijemi běše „Kito husličkar“ Gerata Hendricha. Wopytowarjo wustajeńcy wuhladachu we witrinje tuž tež mnohe serbske titule. Dźakowano jeje wuměłstwu bu někotrežkuli ilustrowane wudaće za čas NDR jako najrjeńša kniha wuznamjenjene.