Mjenje hač tysac schorjenych
Budyšin. Wokrjes Budyšin je wčera wo 63 dalšich natyknjenjach z koronawirusom a wo dwěmaj smjertnymaj padomaj informował. Wot 967 schorjenych (-107) tuchwilu 143 (-13) stacionarnje lěkuja. Incidenca wučinješe 259. Štyri nowoinfekcije a dźesać zemrětych mějachu wčera we wokrjesu Zhorjelc. Incidenca tam bě 198,63.
Nowy předsyda rady
Berlin. Heinrich Bahnsen je nowy předsyda Mjeńšinoweje rady Němskeje. To zdźěli sekretariat rady w Berlinje. Sewjerny Friza naslěduje předsydu Domowiny Dawida Statnika. W swojej hamtskej periodźe chce bywši wjesnjanosta Brekluma Europsku uniju nastupajo mjeńšinowe prawa dale k zamołwitosći namołwjeć. Zastupnicy mjeńšin nawodnistwo rady po rotaciskim principje wobsadźeja.
Narěč Jany Simon wušła
Byrnjež měł so tuchwilu po móžnosći kóždemužkuli kontaktej k cuzym ludźom zadźěwać, zwěsća w policajskich rewěrach Budyskeho a Zhorjelskeho wokrjesa, zo mnozy wobydlerjo wosobinsce přińdu, zo bychu njedostatk abo delikt přizjewili. To pak tež hinak dźe.
Budyšin (SN/MWj). Za wulki dźěl deliktow, kotrež chcedźa ludźo policiji přizjewić, móhli woni internetny portal online-straže wužiwać. Na to skedźbnja Zhorjelska policajska direkcija w nowinskim wozjewjenju. Tak móža direktnym kontaktam zadźěwać. Online-straža hodźi so předewšěm za tajke delikty, hdźež policisća hnydom zakročić njetrjebaja, kotrež pak maja so přiwšěm přizjewić. Mjez druhim su to pady kaž pokradnjene koleso, namórany grafiti, padustwo we wobchodźe abo wohidny komentar w interneće. Štóž pak sej wěsty njeje, hač so jeho naležnosć za přizjewjenje w online-straži hodźi abo nic, móže so telefonisce na kóždym policajskim rewěrje wobhonić.
Chrósćicy (SN/MWj). Někotre puće w Chrósćicach přichodnje tak kaž dotal wužiwajomne njebudu. Wjetšina gmejnskich radźićelow je na swojim posedźenju minjeny štwórtk wobzamknyła wotpohlad, prawa za wužiwanje hasow Při pastyrni, Při Satkuli a Cyrkwinska hora wobmjezować. Po doskónčnym schwalenju budu tam jenož hišće jězdźidła hač do dźewjeć tonow jězdźić směć. Pozadk je, zo njeměli so puće kóncować a zo měł so tam wobchad změrować.
Mjenowane puće njejsu po słowach wjesnjanosty Marka Klimana (CDU) za ćežke awta twarjene. Tohodla budźe jězdźidłam, kotrež su ćeše hač dźewjeć tonow, zakazane, zo tam jědu abo steja. Wuwzaća pak su na přikład zasadźenja z wohnjowobornym awtom, Lkw-je, kiž wotpadki wotwožuja, a dodawanske jězdźidła, kotrež na přikład ludźom nowe meble přiwjezu. Tež kermušny karusel tajke wuwzaće je.
Wojerecy. Do dweju bydlenskeju blokow na Hasy Käthy Niederkirchner we Wojerecach-Nowym měsće zatwarja bydlenjotwarska towaršnosć liftaj. Nimo toho tam wjace hač 30 prózdnych bydlenjow modernizuja. Za to nałoža něhdźe połdra miliona eurow, kaž předewzaće zdźěli. Tuchwilu bydli tam wjace hač 120 swójbow. Blokaj słušatej k najstaršim w měšćanskej štwórći, twarjenej w 1960tych lětach. Z wulkimi bydlenjemi a šěrokimi schodami su tehdy hišće wulkomyslnje twarili. To wopokazuje so nětko jako lěpšina, přetož liftaj hodźitej so bjez problemow přiměrić. W bydlenjach ponowjeja durje a špundowanje, kupjele wuhotuja zdźěla z dušemi. Nazymu ma wšitko hotowe być.
Wjesna rada so zetka
Delnja Kina. Měšćanski wuwićowy koncept 2030+ budźe jedna z temow posedźenja Delnjokinjanskeje wjesneje rady jutře, wutoru, w 19 hodź. na radnej žurli města Budyšina na Nutřkownej Lawskej. Nimo toho póńdźe wo to, kak pjenjezy ze sakskeje komunalneje pawšale za projekt w Delnjej Kinje wužiwać.
Nowa Cala (SN/MiR). Hospodarski a financny wuběrk Krajneho sejma Braniborskeje je přihłosował próstwje, přewostajić prioratej Nowa Cala ležownosć za twar noweho klóštra. Za to předwidźana je něhdyša hajnkownja w Treppelnje. Braniborska kulturna ministerka Manja Schüle (SPD) k tomu rozłoži: „Wobzamknjenje je historiski rozsud. Tak je puć doskónčnje swobodny za prěni nowy klóšter cisterciensow w Braniborskej po srjedźowěku. Znowazałoženje nawjaza na lětstotki staru tradiciju. Něhdźe 750 lět klóštra Nowa Cala su zdobom 750lětne kulturne stawizny w našim kraju.“ Nowa Cala je jedyn z mało klóštrow w Europje, kotrež su dospołnje zdźeržane. Zdobom je najsewjerniši w stilu čěskeho baroka a słuša do Zhorjelskeho biskopstwa.
Spěšnotesty rozšěrjene
Budyšin. Wo 49 dalšich infekcijach z koronawirusom a dwěmaj smjertnymaj padomaj je Budyski wokrjes sobotu rozprawjał. Incidenca wučinješe tu 247,6. Dokelž su wčera w strowotniskim zarjedźe techniku přerjadowali, njejsu žane nowše ličby wottam wozjewili. Wokrjes poskića spěšnotesty nětko póndźelu, wutoru, štwórtk a pjatk. W Zhorjelskim wokrjesu zwěsćichu wčera 26 nowonatyknjenjow. Incidenca bě tam 199,82.
Wučbu delnjoserbšćiny skrućić
Podstupim. Braniborske kubłanske ministerstwo chce dalekubłanski studij za wučerjow a přidružnikow organizować. Kaž społnomócnjeny kraja za serbske naležnosće Tobias Dünow informuje, chcedźa tak wučbu delnjoserbšćiny skrućić. Poskitk ma wudospołnić wukubłanje wučerjow a wučerkow na Instituće za sorabistiku Lipšćanskeje uniwersity. Klětu nazymu chcedźa powołanje přewodźacy masterski studij zahajić.
Zajim Čechow šćěpjenja dla