Byrnjež měł so tuchwilu po móžnosći kóždemužkuli kontaktej k cuzym ludźom zadźěwać, zwěsća w policajskich rewěrach Budyskeho a Zhorjelskeho wokrjesa, zo mnozy wobydlerjo wosobinsce přińdu, zo bychu njedostatk abo delikt přizjewili. To pak tež hinak dźe.

Budyšin (SN/MWj). Za wulki dźěl deliktow, kotrež chcedźa ludźo policiji při­zjewić, móhli woni internetny portal online-straže wužiwać. Na to skedźbnja Zhorjelska policajska direkcija w nowinskim wozjewjenju. Tak móža direktnym kontaktam zadźěwać. Online-straža hodźi so předewšěm za tajke delikty, hdźež policisća hnydom zakročić njetrjebaja, kotrež pak maja so přiwšěm přizjewić. Mjez druhim su to pady kaž pokradnjene koleso, namórany grafiti, padustwo we wobchodźe abo wohidny komentar w interneće. Štóž pak sej wěsty njeje, hač so jeho naležnosć za přizjewjenje w online-straži hodźi abo nic, móže so telefonisce na kóždym policajskim rewěrje wobhonić.

Na třoch wjesnych pućach w Chrósćicach wužiwanje wobmjezuja

Chrósćicy (SN/MWj). Někotre puće w Chrósćicach přichodnje tak kaž dotal wužiwajomne njebudu. Wjetšina gmejnskich radźićelow je na swojim pose­dźenju minjeny štwórtk wobzamknyła wotpohlad, prawa za wužiwanje hasow Při pastyrni, Při Satkuli a Cyrkwinska ­hora wobmjezować. Po doskónčnym schwalenju budu tam jenož hišće jězdźidła hač do dźewjeć tonow jězdźić směć. Pozadk je, zo njeměli so puće kóncować a zo měł so tam wobchad změ­rować.

Mjenowane puće njejsu po słowach wjesnjanosty Marka Klimana (CDU) za ćežke awta twarjene. Tohodla budźe jězdźidłam, kotrež su ćeše hač dźewjeć tonow, zakazane, zo tam jědu abo steja. Wuwzaća pak su na přikład zasadźenja z wohnjowobornym awtom, Lkw-je, kiž wotpadki wotwožuja, a dodawanske jězdźidła, kotrež na přikład ludźom nowe meble přiwjezu. Tež kermušny karusel tajke wuwzaće je.

Zymske poměry na dróhach su předwčerawšim po připoł­dnju na zwjazkowej dróze B 156 k ćežkemu wobchadnemu njezbožu wjedli, kotrež měješe tragiski wukónc. 53lětny wodźer Opela Corsa bě wot Delnjeho Wujězda do směra na Běłu Wodu po puću. Krótko po wotbóčce do Bjerwałda zajědźe awto na hładkej jězdni nadobo na prawy bok puća, suny so po skłoninje a prasny ­wotboka do štoma. Najebać hnydomne wuchowanske naprawy muž hišće na městnje njezboža wudycha. Jeho 39lětna sobujěduca so ćežka zrani. Z wucho­wanskim awtom dowjezechu ju do chorownje. Na Opelu nasta něhdźe 2 000 ­eurow škody. Zwjazkowa dróha bě ně­hdźe tři hodźiny dospołnje zawrjena. Wobchadna njezbožowa słužba Zhorjelskeje policajskeje direkcije je njezbožo wobdźěłała a pad nětko bliže přepytuje. Foto: Ricardo Herzog

Wojerecy. Do dweju bydlenskeju blokow na Hasy Käthy Niederkirchner we Wojerecach-Nowym měsće zatwarja bydlenjo­twarska towaršnosć liftaj. Nimo toho tam wjace hač 30 prózdnych bydlenjow modernizuja. Za to nałoža něhdźe połdra miliona eurow, kaž předewzaće zdźěli. Tuchwilu bydli tam wjace hač 120 swójbow. Blokaj słušatej k najstaršim w měšćanskej štwórći, twarjenej w 1960tych lětach. Z wulkimi bydlenjemi a šěrokimi schodami su tehdy hišće wulkomyslnje twarili. To wopokazuje so nětko jako lěpšina, ­přetož liftaj hodźitej so bjez problemow přiměrić. W bydlenjach ponowjeja durje a špundowanje, kupjele wuhotuja zdźěla z dušemi. Nazymu ma wšitko hotowe być.

Wjesna rada so zetka

Delnja Kina. Měšćanski wuwićowy koncept 2030+ budźe jedna z temow posedźenja Delnjokinjanskeje wjesneje rady jutře, wutoru, w 19 hodź. na radnej žurli města Budyšina na Nutřkownej Lawskej. Nimo toho póńdźe wo to, kak pjenjezy ze sakskeje komunalneje pawšale za projekt w Delnjej Kinje wužiwać.