Wuježk. Krajny zarjad za rěčne zawěry je spušćadło při Wuježčanskim młynje pola Wósporka wottwarić dał. Z tym Lubata (Löbauer Wasser) w tymle wotrězku zaso po normalnej skłoninje ćeče a móže so tak přirodnje wuwić. Twarske dźěła su so loni zahajili a płaćachu 350 000 eurow, kotrež zapłaćištej Zwjazk a Sakska.
Poskićeja znowa pomoc
Budyšin. Za čas lockdowna Budyske wosady kaž tež dobroćelskej zwjazkaj Caritas a diakonija potrěbnym pomoc poskićeja. Štóž staroby abo strowotnych přičin dla bydlenje wopušćić njemóže, dóstanje wot pomocnikow podpěru při nakupowanju, wobstaranju lěkow a dalšich wažnych naležnosćach. Docpějomni su pomocnicy wot póndźele do štwórtka stajnje wot 13 do 15 hodź. pod telefonowym čisłom 0 35 91 / 5 97 95 37, zwonka toho časa přez wotmołwjak.
Alarm w žonopowej fabrice
Mały Wjelkow. K wulkozasadźenju wohnjoweje wobory je dźensa rano w Małym Wjelkowje dóšło. Krótko po 6 hodź. přizjewi w tamnišej žonopowej fabrice awtomatiska připrawa alarm. Přičinu namakachu wohnjowi wobornicy před zawodom w kontejneru, z kotrehož smjerdźeše a para wustupowaše. Dokelž w bliskosći tež strašne maćizny składuja, přiwołachu přidatnych kameradow. Dohromady bě 60 wobornikow zasadźenych. Na městnje natwarichu dekontaminěrowanske městno. Ze škitnej drastu podaštaj so wobornikaj do kontejnera. Wonaj móžeštaj změrować, zo jednaše so jeničce wo skóncowanu wopłóčkowu rołu a zo žadyn strach njewobsteješe.
Budyšin (SN/MWj). Powětrowe wuchowanje DRF je w swojim Budyskim zepěranišću krótko do hód přidatny wuchowanski helikopter zasadźiło. Přičina je po informacijach DRF wobstajne napjate połoženje koronoweje pandemije dla. Nowy helikopter typa EC 135 z pomjenowanjom „Christoph 114“ ma dotalny helikopter „Christoph 62“ při nuzowych zasadźenjach wolóžić. Na te wašnje móža wjetši „Christoph 62“ prěnjorjadnje za tych pacientow zasadźić, kotřiž su na kowid-19 schorjeli a kotrychž dyrbja z jedneje chorownje do druheje přepołožić.
Wysokich ličbow koronowych infekcijow dla bě Swobodny stat Sakska powšitkownowužitnu wuchowansku organizaciju prosył, w Budyšinje přidatny helikopter zasadźić. „Za nas njebě žane prašenje, tajkemu přeću wotpowědować, wšako dyrbimy nětko wšitcy hromadźe stać“, praji předsyda předsydstwa DRF dr. Krystian Pracz. Wón dźakuje so wšitkim sobudźěłaćerjam, kotřiž běchu zwólniwi, krótkodobnje z noweho městna sem skutkować.
Rakecy (JK/SN). Rakečanska gmejna planuje na dwě lěće. Premjera dwójneho etata złožuje so na solidny zakład. Dobre hospodarjenje minjenych lět so nětko wudani a runa puće do jasneho komunalneho přichoda. Na minjenym posedźenju gmejnskeje rady předstajištaj wjesnjanosta Swen Nowotny (CDU) a jeho komornica Franziska Pfeiffer pozadk a zaměr noweho hospodarskeho plana.
Likwidita gmejny je dźakowano wurunanym a wěstym dochodam z dawkow, wosebje přemysłoweho a wobrotoweho, jara dobra. Běžne kredity hodźa so derje posłužować, a swójski podźěl za planowane projekty je zawěsćeny. W minjenych dźewjeć lětach je so gmejnje poradźiło, dołh wo 1,3 miliony eurow pomjeńšić. Tak budźe gmejna Rakecy kónc lěta 2022 jenož hišće z 289 eurami na wobydlerja zadołžena.
Poslednje dny stareho a prěnje dny noweho lěta su na mnohich městnach składnosć, na dźěło zašłych měsacow zhladować. Serbske Nowiny rozhladuja so po dwurěčnych komunach, što su tam zdokonjeli.
Malešecy (CS/SN). Krótko do hód móžachu w Budyšinku wotrězk hłowneje dróhi přepodać, kotruž běchu w minjenych měsacach wobšěrnje wutwarili. K tomu słušeše tež nowe busowe zastanišćo, kotrež wuhotowachu po aktualnych předpisach DIN tak, zo móža je tež zbrašeni wužiwać. Dalše wotrězki hłowneje dróhi chcedźa wot klětušeho nalěća ponowić.
Budyšin (SN/at). Wjelelětny bywši Budyski twarski měšćanosta Peter Hesse je 23. decembra 65lětny zemrěł. Wo tym informowaše wčera Budyske měšćanske zarjadnistwo. W nekrologu waži sej wyši měšćanosta Alexander Ahrens (SPD) skutkowanje zemrěteho za zachowanje Budyskeho stareho města. „Peter Hesse njebě jenož dlěje hač dwaj lětdźesatkaj twarski měšćanosta města a připóznaty a waženy architekt, ale wón bě we wosebitej měrje škitar a zachowar Budyskeho stareho města“, piše Ahrens w nekrologu. Słužbny čas Hessy njecharakterizuja jenož wobšěrne a dźensa skoro dospołnje wotzamknjene saněrowanje stareho města, přestrukturowanje bydlenskeje štwórće Strowotna studnja, ale tež podawki kaž wotstronjenje škodow wulkeje wody lětstotka 2010.
Kaž dale rěka, „bě Peter Hesse předewšěm za swoje pragmatiske rozrisanja w měšćanskej radźe a w měšćanskim zarjadnistwje znaty, kiž njebě so bojał, wosobinsce do Drježdźan jězdźić, zo by financne srědki za saněrowanje stareho města sobu wobstarał“. Smjerć Petera Hessy je za město wulka strata.