Worklecy (JK/SN). Koronapandemija je jasnje pokazała, hdźe su techniske njedostatki našeho kubłanskeho systema. Tež we Worklecach steja před wulkim nadawkom, zakładnu kaž tež wyšu šulu za přichodne, naročne a nowe formy digitalneho wuwučowanja wuhotować. Na wčerawšim poslednim lětušim posedźenju gmejnskeje rady połožichu za to zakłady. Planowanski běrow Lipič z Jaseńcy bě nadawk dóstał, nastajić plan za digitalnu syć we woběmaj kubłanišćomaj. A měješe so tež wo firmu starać, kotraž instalaciju přewjedźe. Plan steji, a Njebjelčanskej Šustrec elektrofirmje su wčera jednohłósnje nadawk přepodali. Wona přewozmje instalaciju digitalneje syće w zakładnej šuli a wobnowi we wyšej přidatnje elektrisku syć za cyłkownje 79 900 eurow. Z přihotami su hižo započeli, dokelž je šulske twarjenje prózdne a šulerjo doma wuknu. Přewažny dźěl dźěłow budźe klětu w zymskich prózdninach zwoprawdźeny.
Čorny Chołmc (aha/SN). „Dajće so zakuzłać w Krabatowej wsy!“ Takle Čorny Chołmc internetnje za sebje wabi. Wjes z nimale 800 wobydlerjemi bu před 14 lětami do Wojerec zagmejnowana, přiwabliwa pak je hač do dźensnišeho. Wulke zasłužby na tym ma Gertrud Wincarjowa, kotraž swjećeše njedawno 80. narodniny. 17 lět bě wona tam Čornochołmčanska wjesnjanostka a po tym wjesna předstejićerka. Jeje najwjetša zasłužba drje je Krabatowy młyn. Ale tež druhdźe je swoje slědy zawostajiła. Hižo wot NDRskeho časa steješe wosrjedź wsy štyri metry šěroki metalowy swěčkowy wobłuk, pokazowacy w swojim wuhotowanju jónu na hórnistwo a dale na serbske stawizny holanskeje wsy, kotraž bu 1394 prěni raz pisomnje naspomnjena.
Kulow (AK/SN). Wobydlerjo města Kulowa a jědnaće wjesnych dźělow Brěžki, Dubrjenk, Hózk, Kulowc, Koćina, Mučow, Klóšterska Nowa Wjes, Rachlow, Salow, Sulšecy a Spale wola klětu noweho měšćanostu. Wólby maja so 9. meje wotměć. Móžny druhi wólbny přechod chcedźa tři tydźenje pozdźišo přewjesć, potajkim 30. meje. To je Kulowska měšćanska rada na swojim zašłym posedźenju wobzamknyła. Sydomlětna hamtska doba měšćanosty so potom skónči.
Budyšin/Drježdźany (SN/JaW). Po wšej Sakskej běža přihoty, zo móhli prawje bórze započeć wobydlerjow přećiwo koronawirusej šćěpić, ručež trěbny serum změja. Wo tym informuje sakske ministerstwo za socialne a towaršnostnu zwjazanosć na naprašowanje.
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. Serbske Nowiny tule dźensa posledni projekt w serialu předstaja.
We Wochožanskim parku błudźenkow budźe přichodnje móžno, so digitalnje tež serbskorěčnje po najwjetšej kamjenjowej zahrodźe Europy wodźić dać. Poskitk wudospołnja tak mjenowany, tuchwilu němčinu, pólšćinu a čěšćinu wopřijacy audioguide, z kotrymž móža sej wopytowarjo park samostatnje ze šmóratkom wotkryć. Wotpowědna aplikacija, kotruž tuchwilu dowuwiwaja, ma klětu na zwučenych platformach, kaž na přikład Google play abo App store, jako darmotny download přistupna być.
Hladarnje jara potrjechene
Budyšin. Wo 295 nowych natyknjenjach z koronawirusom rozprawješe wčera Budyski wokrjes. Třo pacienća zemrěchu. Jara potrjechene su hladarnje w Sprjewinym Dole, Budyšinje, Ohornje, Biskopicach a Kamjencu, hdźež zwěsćichu wot kónca zašłeho tydźenja dohromady 133 infekcijow. W Zhorjelskim wokrjesu bě wčera w zwisku z koronu dalše 223 infekcijow a 14 smjertnych padow.
Hriwny přeco hišće měnjeja
Erfurt/Drježdźany/Frankfurt n. M. Ludźo w Durinskej a Sakskej namakaja přeco hišće mnóstwa stareje měny hriwny, hdyž rumuja abo hdyž namrěwaja. Lětsa měnjachu w filialach zwjazkoweje banki hač do kónca nowembra 1,86 milionow hriwnow, kaž z ličbow kreditneho instituta za wobaj krajej wuchadźa. Mějićeljo sumow stareje měny dóstachu za to 952 228 eurow.
Pjerizna dyrbi nutřka wostać
Pjenjezy duplikaty byli
Wojerecy. Z witriny wotnožki pjenježneho instituta na Hrodowej we Wojerecach su njeznaći w nocy na minjenu njedźelu wustajene pjenjezy pokradnyli. Kaž policija zdźěli, pak jedna so wo duplikaty. Kelko jednotliwych pjenjez su skućićeljo sobu wzali, njeje hišće jasne.