Skićeja njetopyrjam nowy domicil
Pola Wojerec planuje krajny zarjad za rěčne zawěry klětu wobšěrne saněrowanje nasypa podłu Čornicy a Čorneho Halštrowa. Přihotowanske dźěła tam hižo z połnej paru běža.
Wojerecy (SN/MWj). 18 nowych kwartěrow za njetopyrje je Wojerowska wodowa mištrownja wčera při Čornym Halštrowje pola Wojerec připrawiła. Njetopyrjowe kašćiki su jedna z wjacorych kompensaciskich naprawow za planowane saněrowanje nasypa podłu Wojerowskeje Čornicy a Čorneho Halštrowa, štož maja za přichodne lěto předwidźane. Kaž krajny zarjad za rěčne zawěry (LTV) informuje, trjebaja rozdźělne družiny njetopyrjow tež rozdźělne kwartěry. Tohodla zasadźa w swojej akciji tři wšelake njetopyrjowe kašćiki. Zo bychu małe cycaki swój nowy domicil tež přiwzali, připrawja je we wysokosći znajmjeńša štyrjoch metrow. Dokelž maja njetopyrje rady ćopło, njesmědźa jich kašćiki do sewjera wusměrjene być. Nimo toho dyrbitej přilět a wotlět bjez zadźěwkow móžnej być.
Wěži matej zaso kulu a křiž
Z ponowjenymaj cyblomaj saněrowanje třěchi cyrkwje wotzamknjene
Chrósćicy (SN/MWj). Byrnjež chětro zymny a jěry bě dźensa dopołdnja w Chrósćicach přiwšěm swjatočny a tež historiski wokomik. Horstka Chróšćanow mjenujcy sobu dožiwi, kak twarscy dźěłaćerjo najprjedy na sewjernu a potom na južnu nabóčnu wěžu pozłoćanu kulu a swjaty křiž připrawichu. „Z tym je hač na někotre maličkosće cyłkowne ponowjenje třěchi farskeje cyrkwje wotzamknjene“, rjekny farar Měrćin Deleńk.
Na małym nyšporje bě wón do toho kulu a křiž za sewjernu wěžu požohnował. Zhotowił bě jej Jasčanski kowar Michael Kaczmar. Pozłoćił je jej Rjenčec předewzaće z Dobrošic. W zašłych štyrjoch měsacach dóstaštej wobě wěži nowu cyblu z drjewa a kopora.
Ze susodnymaj komunomaj
Město Wojerecy chce so přichodnje ze susodnymaj komunomaj sylnišo splesć. To je nowy wyši měšćanosta Torsten Ruban-Zeh (SPD) wčera na posedźenju měšćanskeje rady podšmórnył, mějo so po swojim připowědźenju při zapokazanja do zastojnstwa.
Wojerecy (AK/SN). Z jednym wzdaćom hłosa je wjetšina měšćanskich radźićelow zaměrowemu dojednanju mjez městom Wojerecami a gmejnu Sprjewinym Dołom přihłosowała. Wobě komunje změjetej přichodnje zhromadneho społnomócnjeneho za daty. Wón nadawki spjelni, kotrež měšćanske kaž tež gmejnske zarjadnistwo runje tak potrjechi.
Gmejna Sprjewiny Doł bě so loni nastupajo tutu naležnosć naprašowała. Jej dźeše wo zhromadne dźěło mjez komunomaj a chcyše docpěć, zo Wojerowski społnomócnjeny za daty swoje nadawki zdobom za gmejnu Sprjewiny Doł spjelni. Temu su dobroćiwje a wotewrjene rozjimali. Město Wojerecy próstwje zasadnje přihłosowaše. Jako wuslědk jednanjow předleži nětko zaměrowe dojednanje. Sobu zakótwjeny je zarjad za prawniski dohlad Budyskeho wokrjesa.
Natwarja zaso mlokowu rampu(19)
Idejowe wubědźowanje Sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. Serbske Nowiny rjad drobnych a małych projektow w serialu přichodne tydźenje předstajeja.
W Kinajchće (Kühnicht), wjesnym dźělu města Wojerecy, ma prawje bórze zaso historiska mlokowa rampa nawjes pyšić. Za zwoprawdźenje projekta zasadźa so tamniše wjesne towarstwo.
Pjenjezy za swoje předewzaće přińdu ze Sakskeho fondsa „Čiń sobu!“. Z nim zmóžnja swobodny stat wobydlerjam, towarstwam a socialnym nošerjam kaž tež komunam we łužiskim a srjedźoněmskim brunicowym rewěrje, kónca wudobywanja wuhla hač do lěta 2038 dla, trěbnu strukturnu změnu sobu wuhotować. „Wjesne towarstwo Kinajcht so aktiwnje na wuhotowanju přichoda našeje domizny wobdźěla“, potwjerdźa jeho čłon Thomas Balko. K zwoprawdźenju předewzaća „Znowanastajenje historiskeje mlokoweje rampy“ su so wo podpěru z Čiń sobu-fondsa prócowali a zamołwići přizwolichu jim w kategoriji „Łužica – žiwa dwurěčnosć“ 1 600 eurow.
Krótkopowěsće (25.11.20)
Próstwu wo pomoc stajili
Budyšin. Budyski wokrjes pomha Marje-Marćinemu bydlenskemu zhromadźenstwu w Pančicach-Kukowje a Budyskemu domej Słónčny dwór dohladowanje pod přiwótřenymi wuměnjenjemi korony zaručić a prócuje so k tomu wo podpěru zwjazkoweje wobory. Wčera bě we wokrjesu 142 nowoinfekcijow z koronawirusom, dwaj pacientaj staj zemrěłoj. Wot aktualnje 2 122 (-16) schorjenych lěkuja 127 (+7) w klinikach.
Ze zhromadnym předewzaćom
Choćebuz/Janšojce. Připrawa za energetiske zwužitkowanje zarunanskich paliwow ma w industrijnišću Janšojskeje milinarnje nastać. K tomu stej LEAG a firma Veolia zhromadne předewzaće EVA Jänschwalde GmbH & Co. wutworiłoj, kaž energijowy koncern wčera zdźěli. Na nowej zhromadnej towaršnosći ze sydłom w Choćebuzu staj wobaj partneraj po połsta procentach wobdźělenej.
Ćahi we wuběžku spěšniše
Bliskosć budźe tež z wotstawkom móžna
Wojerecy (SiR/SN). Klětu budźe tomu 20 lět, zo přewjeduja we Wojerecach kóždolětnje žiwy adwentny kalender. Štož bě hewak nimale samozrozumliwe, pak bě lětsa wulke prašenje. Hižo něšto měsacow hłowny organizator Torsten Vogel starosćiwje rozmysluje, kajki móhł tajki žiwy kalender w časach koronapandemije wupadać. Pomhało jemu při tym je, zo je z rozmołwow z mnohimi ludźimi nazhonił, kak jara sej wobydlerjo zhromadnosć z druhimi přeja.
Torsten Vogel je sej wěsty, zo je bliskosć tež z wotstawkom móžna. „Sym stajnje znowa začuwał, kak wažna zhromadnosć je, runje nětko“, měni diakon. 54lětny je při prěnim lockdownje ze synom Fritzom často při Serbskej studni na torhošću před Wojerowskej radnicu hudźił. Mnozy jemu tehdy wobkrućichu, zo so z pomocu hudźby z druhimi zwjazani čuja. Tež to bě sobu přičina, zo je Torsten Vogel nowy, pandemiji wotpowědowacy koncept za žiwy adwentny kalender planować započał.
Projekt předźěłuja
Běły Chołmc (AK/SN). Na přichodnym posedźenju Łazowskeje gmejnskeje rady 8. decembra chce inwestor Daniel Scholze swój předźěłany koncept wo přichodnym wužiwanju bywšeje Běłochołmčanskeje zakładneje šule předstajić. Wón chce objekt na wellnessowy hotel z třomi hwězdami, kofejownju a wupožčowarnju kolesow přetwarić. Twarske dźěła chcychu poprawom hižo lětsa w lěću zahajić a hač do meje 2021 wotzamknyć. Časćišo běchu so w zašłosći Łazowscy gmejnscy radźićeljo za aktualnym stawom wobhonili. Tón zhonja nětko na přichodnym posedźenju swojeho parlamenta.
Nowy informaciski system
Budyšin. Na internetnej stronje města Budyšina nańdu zajimcy nětko nowy wobydlerski informaciski system. Tón skići móžnosć, sej zjawne předłohi a wobzamknjenja měšćanskeje rady, jeje wuběrkow, wjesnych radow a dalšich gremijow wobhladać. Nimo toho poskićeja tam aktualnu protyku z terminami posedźenjow a z přeprošenjemi.
Dwěluja nowych městnow dla
Wo prašenju, kelko přistajenych móža sej dowolić, wobšěrnje diskutowali
Budyšin (CS/SN). Plan dźěłowych městnow města Budyšina bě tele dny hłowna tema wurjadneho posedźenja tudyšeje měšćanskeje rady. Na wšě tři hodźiny su radźićeljo změny za hospodarski plan 2021 rozjimali. Hłowny wuběrk bě změny hižo wotpokazał.
Stajnje zaso jewjachu so mjez radźićelemi dwěle, kak hodźi so při woteběracych klučowych připokazankach ličba městnow powjetšić. Načolni zastupjerjo města spytachu wobkrućić, čehodla je na přikład jedne městno za wobstaranje spěchowanskich srědkow a dalše za wupisanja trěbne. Po wobšěrnej diskusiji so skónčnje na to dojednachu, zo měłoj so wobaj nadawkaj z jednym městnom zmištrować hodźeć.
Policija (24.11.20)
Pytaja swědkow njezboža
Hodźij. K wobchadnemu njezbožu, kotrež je so předwčerawšim popołdnju w Hodźiju stało, pyta policija swědkow. 61lětny wodźer Fiata bě tam ze wsy na statnu dróhu S 111 do směra na Budyšin wotbočił. Při tym přewidźa wón 35lětneho muža, kiž na kolesowanskim puću jědźeše. Kolesowar so ćežko zrani, jeho dowjezechu do chorownje. Pola zawinowarja zwěsćichu 0,38 promilow alkohola w kreji. Štóž je njedźelu w 14.30 hodź. w Hodźiju něšto wobkedźbował, njech so pola policije přizjewi.
Měli alternatiwy rozjimać
Diskusija wo nowym komunalnym traktoru w gmejnje Ralbicy-Róžant je tež rozmyslowanje wo hinašich móžnych strukturach nastorčiła.
Ralbicy (JK/SN). Wuradźowanja a wotwažowanja k tomu, kak měli problem noweho komunalneho traktora za gmejnu Ralbicy-Róžant rozrisać, su na minjenym posedźenju gmejnskeje rady nowu dimensiju docpěli. Po tym zo bě so wujasniło, zo zawinuja wosebje specielne nastroje za najwšelakoriše dźěła eksorbitantnu płaćiznu, rozmysluja tam nětko wo móžnym rozrisanju zasadneho problema do hinašeho směra.
