Policija (27.11.20)
Wšo w porjadku było
Nowoslicy. Jako wopačny alarm wopokaza so informacija wo manipulowanym płunowodźe z wysokim ćišćom w Nowoslicach, wo čimž wčera na tymle městnje rozprawjachmy. Kaž přepytowanja policije hromadźe z płunowym zastaraćelom nětko wunjesechu, bě pječa wot cuzych zawrjeny wentil najskerje hižo wot oktobra zawjertnjeny. To pak dotal napadnyło njeje, dokelž so minjene tydźenje tak wjele płuna přetrjebało njeje. Njedowolene zapřimnjenje móže policija tuž wuzamknyć a tež swědkow w tym zwisku hižo njepyta.
Inwestuja do wěstoty wobornikow
Běła Woda (AK/SN). Dohromady 120 dospołnych sadźbow drasty za nutřkowne a wonkowne hašenje chce město Běła Woda kameradam dobrowólneje wohnjoweje wobory kupić. Tole su čłonojo měšćanskeje rady na swojim zašłym posedźenju jednohłósnje wobzamknyli. Nadawk we wobjimje 94 000 eurow dósta firma Tesimax z Badensko-Württembergskeje. Spočatnje běchu samo 115 000 eurow kalkulowali a při tym kriterije kaž płaćiznu, material a wšelake kmanosće drasty wobkedźbowali. Mjenowana firma je při tym najlěpje wotrěznyła.
„Dotal je Běłowodźanska wohnjowa wobora stajnje jenož dodźeržanu abo skóncowanu drastu wuměniła“, rozłoži wyši měšćanosta Torsten Pötzsch (Klartext). „Wosebje cholowy kameradow su jara strapacěrowane. Nastajnosći dyrbja nowe wobstarać. Wot lěta 2011 smy to nimale kóžde lěto činili. Wot lěta 2015 tež nakup nowych kabatow přiběra, wosebje wot lěta 2017.“
Krótkopowěsće (27.11.20)
Kapacity nimale wučerpane
Budyšin. Socialne zarjadnišćo klóštra Marijineje hwězdy je jara wot natyknjenjow z koronawirusom potrjechene. Na to skedźbni wčera krajnoradny zarjad. W gmejnje Pančicy-Kukow je 59 schorjenych, w Chróšćanskej samo 63. Wčera su w Budyskim wokrjesu 217 nowych infekcijow a dźewjeć smjertnych padow zwěsćili. Kapacity za koronapacientow tudyšich chorownjow su skoro wučerpane.
Filmy jako streamigowy poskitk
Choćebuz. Filmowe předstajenja 30. filmoweho festiwala Choćebuz njemóža so wot 8. hač do 13. decembra w hrajnišćach wotměć. Aktualnje podlěšenych naprawow Zwjazka a krajow přećiwo koronje dla njejsu tež kina přistupne. Najebać to budźe 150 filmow w dobje wot 8. hač do 31. decembra 2020 jako streamingowy poskitk na stronje filmfestivalcottbus.de wotwołajomny.
Wuwiće zawróćene
Dale a wjac wosuškow doma pjeku
Policija (26.11.20)
Problemy z płunom zawinili
Nowoslicy. Manipulowaneho płunowoda z wysokim ćišćom dla přepytuje policija tuchwilu w Nowoslicach a pyta tam móžnych swědkow. Předewzaće płunoweho zastaranja informowaše předwčerawšim policiju wo tym, zo je ćišć w płunowodźe woteběrał. Sćěh toho bě, zo dóńdźe w Kamjencu a wokolinje k wupadam. Po wšěm zdaću běchu njeznaći w Nowoslicach jedyn z hłownych wentilow při wokrjesnej dróze K 7285 zawjertnyli a z tym problem zawinili. Kriminalni technikarjo na městnje slědy zawěsćichu. Kriminalna słužba přepytuje nětko dla mylenja zjawnych připrawow. Štóž móže pokiwy k wopisanemu podawkej podać abo štóž je samo něšto podhladneho wobkedźbował, njech so na Kamjenskim rewěrje pod telefonowym čisłom 03578/ 3520 abo w druhim policajskim běrowje přizjewi.
Stary twarski dwór dóstanje logo
Slepo (CK/SN). Pod wušiknymi rukami Jörga Tauscha nastawa na fasadźe Slepjanskeho „Stareho twarskeho dwora“ logo towarstwoweho a zetkawanskeho domu. „Wonkownje ma widźeć być, zo so tu něšto stawa“, wón rjekny. Wosom towarstwow z dohromady wjace hač 100 čłonami objekt wužiwa.
Swobodny wuměłc z Rownoho je naćisk za logo stworił. Towarstwa rozsudźichu so za pisanu měšeńcu, při čimž steji kóžda barba za jedne towarstwo, wšitke pak su ze sobu splećene. Nad tym je stilizowane lipowe łopješko a serbske barby wotbłyšćuja, kajku hódnotu serbske tradicije, rěč a kultura w Slepom maja. W nazymskich prózdninach je Rownjanski wuměłc 2,40 metrow wysoki relief modelěrował. Nětko jón pomoluje.
Přidatnje wočinjeny
Pančicy-Kukow. Klóšterski wobchod klóštra Marijineje hwězdy w Pančicach-Kukowje w adwentnym času swoje wote-wrjenske časy rozšěrja. Dokelž lětsa w klóštrje koronapandemije dla žane adwentne wiki njezměja, budźe klóšterski wobchod na wšitkich štyrjoch sobotach adwenta stajnje wot 10 do 16 hodź. wočinjeny. Sobotu, 12. decembra, předawaja na klóšterskim dworje zdobom hodowne štomiki.
Pisane kule na Bohatej
Budyšin. 1 300 pisanych a swěćatych kulow pyša wot wčerawšeho Budysku Bohatu hasu. Wudebili běchu je tež serbske pěstowarnje, mjez druhim z Malešec, Chrósćic, Wotrowa, Radworja a Němcow. Tež zakładna šula z Pančic-Kukowa so na akciji města Budyšina wobdźěli.
Wodowód so puknył
Wjes wot wobchada wolóžić
Za móžny móst nad železniskimi kolijemi chcedźa warianty pruwować
Wojerecy (AK/SN). Wobchadne połoženje w Čornym Chołmcu a móžnosće jón změnić běchu jedna z temow na zašłym posedźenju Wojerowskeje měšćanskeje rady. Za wjes měli wobjězdku twarić, po kotrejž wjedu wobchad ze wsy won, tak zo po statnej dróze S 198, kotraž je hłowny wjesny puć, mjenje wosobowych a nakładnych awtow do směra na łužisku jězorinu jězdźi. Tole wjesna předstejićerka Claudia Jurisch na posedźenju radźićelow podšmórny. „Wjesny puć njesměł žana přijězdka k mostej być“, rjekny wona hladajo na móžny móst nad železniskej čaru na kromje wsy. Wjetšina měšćanskej rady přihłosowaše, zo maja za to wšelake warianty pruwować a kmane městno za móst pytać. Partnerojo při tym su krajny zarjad za dróhotwar a wobchad (LASuV), Budyski wokrjes kaž tež měsće Łuty a Wojerecy. Za pruwowanje maja we Wojerecach klětu 35 000 eurow a lěto pozdźišo 20 000 eurow zaplanowane.
Wjace wobchada błóta dla
Mjeńše a wjetše haty abo tež wodowe zběrniki dyrbiš hdys a hdys wurjedźić a z nich wotsadźene błóto wubagrować. Ale dokal z nim? W padźe Hodźijskeho spjatnišća mějachu zajimawu ideju.
Hodźij/Chasow (SN/MWj). Wulke oranžobarbne nakładne awta tłóča so tele dny po wuskich pućach pola Chasowa ze směra zwjazkoweje dróhi B 96 do směra na Radwor. Wone woža tysacy kubiknych metrow wuschnyteho błóta a wusypnu je mjez druhim na bywšu železnisku čaru wuchodnje Chasowa.
Błóto abo modernišo prajene sedimenty pochadźeja z Hodźijskeho spjateho jězora. Tón běchu lětsa wot januara hač do apryla wubagrowali, zo bychu poprawny spjaty wolumen zaso docpěli. Dohromady wuwozychu tehdy ze spjatnišća něhdźe 15 000 kubiknych metrow sedimentow. Kaž w nowinskim zdźělenju krajneho zarjada za rěčne zawěry (LTV) rěka, inwestowaše Swobodny stat Sakska za to něhdźe 270 000 eurow. Zo njebychu mokre błóto transportować trjebali, wotsypnychu je južnje Hodźijskeho spjateho jězora, zo móhło tam wuschnyć.
