Krótkopowěsće (24.08.20)
Financne zamóženstwo rostło
Frankfurt nad Mohanom. Financne zamóženje priwatnych domjacnosćow w Němskej je po woteběranju korony dla po nětko předležacej analyzy hižo zaso rekordny niwow docpěło. Bursa je so wočerstwiła a mnozy ludźo dale wjele pjenjez nałoža. Tuž wuchadźa banka ING Němska z toho, zo je financne zamóženje domjacnosćow kónc junija w sumje na 6,55 bilionow eurow rozrostło.
Funda za CDU nastupi
Slepo. Jörg Funda nastupi za CDU k wólbam wjesnjanosty Slepjanskeje gmejny 1. nowembra. Kaž Zhorjelski wokrjesny zwjazk strony zdźěli, su čłonojo gmejnskeho zwjazka CDU Slepjanska wosada Fundu hižo minjenu wutoru nominowali. Po wotstupje dotalneho wjesnjanosty Reinharda Borka nawjeduje Jörg Funda wot 1. awgusta tamniše zarjadniske zjednoćenstwo nachwilnje.
Matury bjez censurow?
Policija (21.08.20)
Drogi plahował
Łaz. We wjesnym dźělu Łazowskeje gmejny je policija minjene dny mału plantažu konopnych rostlin namakała. Na hornim poschodźe jednoswójbneho domu 60lětneho muža steješe dohromady 15 tychle rostlinow. Nimo toho namakachu zastojnicy wšelki grat za plahowanje tajkich drogow. Policija wšitko sćaza.
Bombu znješkódnili
Chór Budyšin spěwa
Wuježk. Dokelž po wěšćenju wjedrarjow zajutřišim, 23. awgusta, hižo cyle tak horco kaž dźensa njebudźe, móhł so tón dźeń wulět na Čornobóh zadanić. Wot 14 hodź. mjenujcy spěwa chór Budyšin na Čornoboze před tamnišej hórskej bawdu. Koncert wotměje so we wobłuku lětušeho Dnja Hornjeje Łužicy.
Čitaja a hudźa
Liboń. Štyristronski statok w Libonju w Hodźijskej gmejnje budźe jutře, sobotu, wot 15 hodź. městnosć za njewšědne zarjadowanje pod hołym njebjom. Wopytowarjo dožiwja tam čitanja a hudźbu dohromady dźesać sobuskutkowacych z Erfurta, Drježdźan, Budyšina a Berlina. Mjez druhim wustupi Anna-Maria Bretschneiderec.
Seniorojo škotuja
Kozarcy. Přichodny škotowy turněr serbskich seniorow wotměje so wutoru, 25. awgusta, w 14 hodź. Kartyplacarjo zetkaja so tónraz w Kozarčanskim hosćencu „Při kupjeli“, zdźěli organizator Měrćin Nowak. Tež nowačkojo su tam witani.
Na dworowy swjedźeń
Ze samozešitej tobołu kupać jěli
Smjerdźaca (aha/SN). Smjerdźečanske kubłanske srjedźišćo LIPA je lětsa pjaty raz w prěnim a poslednim tydźenju lětnich prózdnin planowało za předšulske dźěći a šulerjow prěnich lětnikow dny wočerstwjenja a sporta. Spočatk prózdnin su tydźeń z dwaceći wobdźělenymi dźěćimi wuspěšnje přewjedli. Za dalši su dóšli telko přizjewjenjow a naprašowanjow, zo dyrbjachu spěšnje přeplanować.
Wustawki za kupjel změnili
Runja wšitkim druhim kupjelam w Hornjej Łužicy je tež Kulowska tele dny přewšo derje wopytana. Přiwšěm wona njedawno měšćanskich radźićelow zaběraše. Někotři wočakuja njewočakowane wobmjezowanja.
Kulow (AK/SN). Měšćanscy radźićeljo Kulowa su sej přezjedni, zo je tamniša lěsna kupjel za město a wokolne wsy dale trěbna. Ju maja dołhodobnje zawěsćić a wo jeje dalšej eksistency njeměli žane dwěle być. Wo změnje popłatkowych wustawkow, kotrež płaća wot 11. decembra 2014, pak maja radźićeljo rozdźělne měnjenja. To wotbłyšćowaše so na zašłym posedźenju měšćanskeje rady, jako tale tema na dnjowym porjedźe steješe a so wo kontrowersnu diskusiju postara.
Skića najlěpše wuměnjenja
We Worklecach nowy hort „K wódnemu mužej“ swjatočnje přepodali
Worklecy (SN/MWj). Ze spočatkom noweho šulskeho lěta budźe wjace hač 120 dźěći Worklečanskeje zakładneje šule nowy hort „K wódnemu mužej“ wopytać. Twar na sewjernej kromje šulskeho areala su wčera popołdnju swjatočnje poswjećili a přepodali. Pod serbskim a němskim napisom kaž tež wobrazom wódneho muža dźěći z kubłarkami mjez druhim zaspěwachu, zo su Worklecy najrjeńše městno w jich domiznje. K tomu mějachu tež wšu přičinu, přetož nowy hort skića najlěpše wuměnjenja za zaběru a zabawu po šuli.
Runje před 16 měsacami su po jutrach 2019 hłubokotwarske dźěła zahajili, rjekny wjesnjanosta Franc Brusk (CDU) w swojej narěči. Tehdy hišće nichtó na to njemysleše, zo móhła koronowa pandemija lěto pozdźišo wšo komplikować. Najebać to wostachu w financnym ramiku 1,8 milionow eurow a tež w časowym planje. Z nowotwara njeprofituja jeno dźěći ze swojimi kubłarkami. Wyša šula je nětko rumnosć wróćenu dóstała, w kotrejž bě do toho hort zaměstnjeny. Dalše rumnosće je wona zakładnej šuli wotedała, praji nawoda Křesćan Korjeńk.
Hišće sylnišo so zwičnjeć
Sydom lět dźěłaše Marco Gbureck we Wojerowskim pjekarskim kombinaće (HOBACK). W naslědniskim zawodźe Heberer bě wón změnowy nawoda, pozdźišo jako samostatny ortopediski technikar bě zamołwity za staršiski sanitetny dom Göde & Gbureck ze štyrjomi filialemi a 17 přistajenymi. „Sym dźěćo tohole města, bjez ćežow tu wotrostł, hač do dźensnišeho tule zakorjenjeny“, praji 43lětny. Wot 2009 do 2018 bě za CDU w měšćanskej radźe. Wot lońšeho pak za AfD. Za nju nastupi přistajeny tamnišeho stronskeho běrowa k wólbam Wojerowskeho wyšeho měšćanosty.
„Wojerecy maja sylne kwality a měli so sylnišo zwičnjeć“, wón podšmórnje. Hospodarske spěchowanje započnje so ze zaměrnym wotkrywanjom industrijnišćow. Město měło w Ćisku a Narću płoniny kupić, je wotkryć, a k přihódnej płaćiznje předać. Cyle nuznje měli B 96 a B 97 wutwarić, na najwažnišich wotrězkach samo na třičarowe dróhi. Nuznje zlěpšić měli tohorunja busowe zwiski z Wojerec do měšćanskich dźělow a do Budyšina.
Krótkopowěsće (21.08.20)
Podpěruja tež małe kina
Drježdźany. Sakska statna kenclija spěchuje přichodnje małe kina w Sakskej, kotrež Zwjazk ze swojim nowym programom njepodpěruje. Tak móhli tež wone korony dla trěbne naprawy zwoprawdźić, kaž šef statneje kenclije a minister za medije Oliver Schenk (CDU) rjekny. Kino, kotrež ma na přikład jenož kónc tydźenja wotewrjene, móže tak hač do 50 000 eurow za inwesticije nastupajo koronaškit dóstać.
Póst inwestuje w Kumwałdźe
Kumwałd. Němski póst swoju rozdźělowansku syć w Sakskej tež přiběraceho online-wikowanja dla rozšěri. W Kumwałdźe su wčera ze symboliskim prěnim zarywom twar noweho roznošowanskeho zepěranišća zahajili. Na nowym logistiskim stejnišću chcedźa klětu kónc januara dźěłać započeć. 38 sobudźěłaćerjow přećehnje potom z dotalneho přemałeho twarjenja do noweho centruma.
Młodym Běłorusam pomhać
Policija (20.08.20)
Rentnarjow zjebali
Mužakow. Z tak mjenowanym šokowym telefonatom staj njeznataj minjene dny w Mužakowje wot dweju rentnarjow pjećcyfrowu sumu pjenjez wulišćiłoj. Při telefonje wudaštaj so jako policistaj a powědaštaj, zo trjeba přiwuzna staršeju ludźi nuznje pomoc, hewak dyrbi hnydom do jastwa. Rentnarjej staj to bohužel wěriłoj a pjenjezy přepodaštaj.
