Zachowaja reje, tradiciju a drastu
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja. Wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Ćišćanska rejwanska skupina (13).
W lěće 1997 swjećachu w Ćisku 750. róčnicu prěnjeho naspomnjenja wsy. Zo bychu w swjedźenskim ćahu na něhdy ryzy serbske sydlišćo skedźbnili, chcychu w nim tež wobraz z tradicionalnymi serbskimi rejemi swojich prjedownikow we Wojerowskej serbskej drasće pokazać. Za to dobychu tehdy wosom porow. Wone so po swjedźenju rozsudźichu, přichodnje dale zhromadnje rejwać. Tak dóńdźe k załoženju Serbskeje rejwanskeje skupiny Ćisk. Prěnja předsydka lajskowuměłskeho cyłka bě Edith Zinkowa. K swojim probam zeńdźechu so na žurli hosćenca „K zelenemu wěncej“, hdźež tež dźensa zwučuja. Cyłk wobsteji tuchwilu z 18 aktiwnje sobuskutkowacych porow.
Pod nawodom Katje a Jakuba Hrjehorjec z Delnich Sulšec měješe ...
Zdobom běda a wjeselo
Z dešćom wočerstwjenje přišło
Krótkopowěsće (18.08.20)
Sakska swjeći 30. róčnicu
Aue-Bad Schlema/Drježdźany. Ze stadionowym koncertom w Aue woswjeći Swobodny stat Sakska swoje nowozałoženje a jednotu Němskeje před 30 lětami. Kaž statna kenclija wčera zdźěli, wustupitej Sakska statna kapała Drježdźany a Krajny hórski hudźbny korps Sakskeje 5. septembra zhromadnje w Rudnohórskim stadionje Aue-Bad Schlema. Nadrobnosće chcedźa jutře wozjewić.
Staroměšćanski festiwal wupadnje
Budyšin. Wot 30. awgusta do 1. septembra planowany staroměšćanski festiwal je Budyske turistiske towarstwo nětko wotprajiło. Předsydstwo towarstwa ma rizika hladajo na koronapandemiju za přewulke. Předwidźany bě po lońšej premjerje festiwala „Woda, wuměłstwo, swětło“ znowa wobšěrny serbski program.
Nowa rektorka uniwersity
Z Pitom po łužiskej jězorinje kolesować a myto dobyć
Zły Komorow (AK/SN). Turistiski zwjazk Łužiska jězorina je hódančkowu čaru „Wot hórnika k namórnikej“ za kolesowacych pućowarjow wokoło Złokomorowskeho a Lejnjanskeho jězora wuwił. „Wona swójby z dźěćimi w starobje zakładneje šule přeproša, změnu krajiny wot hórniskeho rewěra k wočerstwjenskemu paradizej na kolesu aktiwnje dožiwić. 37 kilometrow dołha čara wjedźe wokoło Lejnjanskeho a Złokomorowskeho jězora“, rozłožuje Katja Wersch, sobudźěłaćerka turistiskeho zwjazka za zjawnostne dźěło a marketing.
Hłowna figura hódančkoweje kolesowanskeje čary je Pit, maskotka łužiskeje jězoriny. Na wosom stacijach Pit dźěći namołwja na prašenja wotmołwić. Jězba započina so při Kóšynskim kanalu do Złokomorowskeho jězora. Tam steješe něhdy hoberski bager Ds 1120, wudobywacy čorne złoto z brunicoweje jamy. Druha stacija je markantna wěža „Zerzawy hózdź“, hdźež so Zornowski kanal wuliwa. Tón zwjazuje dźensa Lejnjanski jězor ze Sedlišćanskim. Z wysokeho wuhladnišća widźa wopytowarjo we wokolinje wjacore wsy a jězory.
Tež z listom wolić móžno
Wojerecy. Za wólby Wojerowskeho wyšeho měšćanosty 6. septembra je w tamnišej nowej radnicy wot dźensnišeho běrow za listowe wólby wočinjeny. Štóž chce riziku infekcije we wólbnym lokalu zadźěwać, móže so na te wašnje na wólbach wobdźělić. Wolerjo pak dyrbja škitne naprawy dodźeržeć. Mjez druhim trjebaja škitny nahubnik a swójski pisak za wupjelnjenje hłosowanskeho lisćika.
Serbske blido so zetka
Drježdźany. Trochu wodychnjenja a wokřewjenja wot přehorceho a přesucheho lěća lubi přichodna serbska bjesada w sakskej stolicy. Wona wotměje so srjedu, 19. awgusta, w 19 hodź. w hosćencu „The Red Rooster“, Rähnitzgasse 10.
Policija (17.08.20)
Smjertnej woporaj
Hamor. Na lěsnym puću na terenje LEAG pola Hamora je so sobotu wječor smjertne wobchadne njezbožo stało. 55lětny wodźer Nissana zajědźe w prawej křiwicy na lěwy bok jězdnje a zrazy do wjacorych błudźenkow. Při tym jězdźidło zwróći a 43lětny sobujěducy bu z awta ćisnjeny. Wón hišće na městnje njezboža zemrě. Hižo pjatk wječor bě na zwjazkowej dróze B 156 pola Hamora 50lětny sobujěducy žiwjenje přisadźił, jako do jeho VWja frontalnje Opel zrazy.
Boršć wupadnje – ale nic cyle
Zo njeby so na tradicionalnu zabawu zabyło, su kreatiwne ideje prašane
Kamjenc (UM/SN). To so minjene 65 lět hišće ženje stało njeje: Prěni raz po lěće 1953 Kamjenska Boršć tónraz wupadnje. „W swjedźenskim komiteju smy po wěcownej diskusiji tak rozsudźili. Lochko to na žadyn pad njebě“, praji wyši měšćanosta Roland Dantz (njestronjan) a zdobom předsyda komiteja. Rozsudne bě, zo so po škitnych naprawach korony dla hač do kónca awgusta po cyłej Sakskej žane zarjadowanja z wjace hač tysac wobdźělnikami wotměć njesmědźa.
Premjera za kofejownju a taflu
Wjace wopytowarjow hač hewak registruje tuchwilu zežiwjenski a zelowy centrum klóštra Marijineje hwězdy w Pančicach-Kukowje. Wčera wotmě so tam ze zelowej njedźelu prěnje wjetše zarjadowanje w tymle lěće.
Pančicy-Kukow (SN/MWj). Hinak hač zašłe lěta, wopytowarjo wčera hižo wot připołdnja na zelowu njedźelu do klóštra Marijineje hwězdy w Pančicach-Kukowje přichadźachu. Dokelž běchu lětsa zahajenje sezony kaž tež swójbny swjedźeń a z nim přirodowe wiki wupadnyć dyrbjeli, móžeše wjace wikowarjow regionalnych wudźěłkow hač hewak swoje produkty w chłódku Lipja poskićeć. Paleta sahaše wot kołbasy z jehnjaceho a wowčeho mjasa přez drjewjane wudźěłki hač ke keramiskim debjenkam. Wosebje požadane pak běchu wšitke wudźěłki w zwisku ze zelemi, kaž mydła, korjeniny, wolije atd. Dale su wčera robiniju jako štom lěta sadźili. Hewak činja to stajnje k zahajenju sezony. Na jewišću dožiwichu wopytowarjo pisany program.
