Choćebuz/Budyšin (SN/JaW). Prezidij Zwjazkoweho předsydstwa Domowiny chce so 24. februara z namjetami za ponowjenje sakskeho šulskeho zakonja zaběrać. Wo tym je předsyda Domowiny Dawid Statnik zwjazkowe předsydstwo na posedźenju minjenu sobotu w Choćebuzu informował. Byrnjež so tuchwilu žane widźomne wuskutki za Serbow njewujewili, chcyłoj so Domowina kaž tež Rada za serbske naležnosće Sakskeje k namjetam wuprajić, zdźěli Statnik. Krótkodobnosće dla – hač do 7. měrca maja so přispomnjenja zapodać – chcyli wo tym w prezidiju Domowiny wuradźować a namjet za zapodaće z nawodnicu kubłanskeho wuběrka dr. Beatu Brězanowej wothłosować. Dr. Brězanowa skedźbni na to, namjety dokładnje pruwować, hač so mjez druhim změny spěchowanja šulerjow snano na serbskej internataj w Budyšinje a Choćebuzu njewuskutkuja. Zdobom wona rjekny, zo měła Domowina w swojim stejišću wupady wučby tež na serbskich šulach wobkedźbować a tematizować. Runje tak měli pruwować, w kotrej měrje móhli so personalne ćeže, potajkim njedostatk wučerjow, na wučbu serbšćiny wuskutkować.

Choćebuz (SN/JaW). Čłonstwo Domowiny w Federalistiskej uniji europskich narodnych mjeńšin (FUEN) so za Serbow wulce wudani. Tole je facit rozprawy wo skutkowanju jednaćela třěšneho zwjazka w prezidiju organizacije narodnych mjeńšin. „Serbja wjace z dźěławosće profituja, hač za to nałoža“, rozłoži jednaćel Domowiny Bjarnat Cyž, kiž je zdobom wiceprezident FUEN, minjenu sobotu na wuradźowanju Zwjazkoweho předsydstwa Domowiny w Choćebuzu. „Němcy drje nas tak jara na wědomje njebjeru, wukraj za to ćim bóle“, Cyž podšmórny. Wuhotować wulkoprojekty kaž mjez druhim dwulětnje mjezynarodny folklorny festiwal, to žněje po jeho słowach wulku kedźbnosć na swěće. „Nimo toho smy sej jako Serbja w FUEN wulku kompetencu a připóznaće zdobyli, zo nam rady financy za wšelke projekty přewostajeja.“ Tež němske instancy su za tym přišli, kaž Cyž rjekny.

Radwor (BHR/SN). Na zabawny wječor w „Słodeńku“ je minjeny pjatk Radworski chór Meja přeprosył. Organizator Beno Bělk powita tam něhdźe 50 zajimcow. Takrjec „wuhrjebał“ bě wón rjad starych filmow a filmowych sekwencow z poćahom k Radworjej abo k Serbam. ­Bělk rozprawješe, po kotrych zdźěla njelochkich pućach je tele časowe ­dokumenty nadešoł: na přikład film ­italskeje telewizije RAI z lěta 1985, w kotrymž předstajichu čłonojo chóra Meja serbski kwas. Wulki zajim zbudźi mjez wopytowarjemi pask z časa NDR, jako ­nawjerćachu pola Hantušec swójby w Radworju sceny wo ptačim kwasu. Tam sobu skutkowacy su zwjetša hišće žiwi, byrnjež dźensa ně­hdźe 60 lět starši byli. Tež pask z Chrósćic z lěta 1972 zbudźi kedźbnosć a posměwk mjez přihladowarjemi.

Mjez předstajenjom filmow bě rozprawa Jana Nuka wo jeho lońšim přebytku w Južnej Africe zapołožena. Z fotami rysowaše wón swoje dźěło w misionskej staciji, hdźež wšědnje wjacore sta ludźi z jědźu zastaruja. Tež wo ludźoch, wo jich formach zwuraznjenja a pěstowanja wěry, wo přirodźe a wo zwěrjatach Nuk nazornje přednošowaše.

Chrósćicy (KJu/SN). Na swojej wčerawšej prěnjej zhromadźiznje w nowym lěće je předsydstwo Kamjenskeje župy „Michał Hórnik“ zarjadowanja a projekty, kotrež bě sej do dźěłoweho plana zapisało, skonkretizowało a terminy postajiło.

Tak planuje župa hižo za 28. februar prěni wjeršk. Zhromadnje z Rěčnym centrumom WITAJ přeprošuje wona dźěći, starši, dźědow a wowki na mjeztym 6. swójbnu schadźowanku do Chróšćanskeje „Jednoty“. Tam chcedźa nimo popołdnja ze serbskim kuzłarjom tež paslenske a sportowe zaběry, čitanski stan, krosnowanje a rejwanje, strowe zežiwjenje kaž tež zabawu z wu­knjenskimi a kompjuterowymi hrami skićić. Starši móža při kofeju a tykancu bjesadować. Zežiwjenska poradźowarka Rafaela Wićazowa wěnuje so k temje „Strowa snědań“.

W měrcu wotměje župa dźěłarničku za młode žony a holcy „Kak so sama katolsku narodnu drastu woblěkam“. Tuchwilu župa hišće wo konkretnym terminje jedna. Ručež budźe tón jasny, jón tež na facebookowej stronje župy wozjewja.