Janhoefer dale za Serbow aktiwny
„Mi je so dźěło we workshopach spodobało. A mi je so lubiło, zo je zwjazkowe předsydstwo po cyłej Łužicy pućowało.“ To praješe Wylem Janhoefer na kóncu swojeho – po dwanaće lětach – poslednjeho posedźenja jako čłon zwjazkoweho předsydstwa zašły pjatk w Chrósćicach. Nan małeje holcy chce wjac chwile za swoju swójbu měć. Tohodla njebudźe hižo na hłownej zhromadźiznje za mandat w nawjedowacym gremiju třěšneho zwjazka kandidować. Njedawno wšak bu znowa do předsydstwa župy Delnja Łužica woleny, tuž wostanje w narodnej organizaciji dale prezentny. Jara aktiwny je nimo toho jako čestnohamtski zamołwity za serbske naležnosće w hamće Bórkowach, kotremuž šěsć gmejnow přisłuša. Janhoefer bydli w najwjetšej z nich, w Bórkowach, pochadźa pak z Prjawoza.
Prezidij Domowiny so schadźował
Wo wšelake delegowanja za zastupjerjow Serbow na zarjadowanja w tu- a wukraju staraše so prezidij Domowiny. Nimo toho su čłonojo gremija hižo hłownu zhromadźiznu přihotowali.
Budyšin (SN). Na swojim wčerawšim posedźenju je prezidij Domowiny zastupjerja Serbskeho młodźinskeho towarstwa Pawk na jutrowny seminar młodźiny domoródnych narodnych mjeńšin Europy MENS pod hesłom „widźomnosć płaći / visibility matters“ delegował. Tutón wotměje so wot 11. do 18. apryla w pólskim Opole. Seminar organizuje tamniši młodźinski zwjazk němskeje mjeńšiny.
Dale powoła prezidij projektnu managerku Domowiny Melanie Hajnkec jako zastupjerku Serbow do zwjazka „Partnerstwa za demokratiju“ města Budyšin w dobje 2025-2029. Jako zastupowacu čłonku postajichu čłonojo prezidija hłownu jednaćelku třěšneho zwjazka Judit Šołćinu. Zaměry zwjazka su mjez druhim skrućenje towaršnostneho angažementa: spěchowanje demokratiskeje, tolerantneje a wšelakoreje zhromadnosće kaž tež prewencija přećiwo radikalizaciji a ekstremizmej.
Marja Michałkowa so dale angažuje
„Wutrobny dźak za derje přihotowane posedźenja. Sym rady w tutym gremiju dźěłała.“ Pjatk je so Marja Michałkowa po dwěmaj wólbnymaj periodomaj ze zwjazkowym předsydstwom Domowiny rozžohnowała. Chwalobnje wuzběhny 75lětna „zhromadne dźěło Serbow wšelakich generacijow“ w gremiju. Hižo 2023 je sakske předsydstwo towarstwa „donum vitae“ wotedała, kiž bě wot lěta 1999 wukonjała. Byrnjež něhdyša wjelelětna serbska zapósłanča CDU w zwjazkowym sejmje (1990, 1991-1994, 2002-2017) dosć rjaneje zaběry z wnučkami a swójbu měła, so wona dale čestnohamtsce angažuje. Jako předsydka Křesćansko-socialneho kubłanskeho skutka (CSB) leži jej dalewuwiwanje strukturow, nic naposledk za pěstowarnje, na wutrobje. Tola tež kruhej přećelow klóštra Marijiny doł połna elana předsydari. Tak zběra tuchwilu pjenjezy za nowe pišćele. Nowa administratorka, kotraž klóšter nachwilu nawjeduje, so jara za Serbow zajimuje a tež na jutrownych wikach w Budyskim Serbskim domje poby.
Joachim Glücklich kandidat župy
Župa „Handrij Zejler“ Wojerecy je jako kandidata za zwjazkowe předsydstwo Domowiny wučerja na wuměnku Joachima Glücklicha namjetowała. To je župne předsydstwo wčera wobzamknyło.
Wojerecy (SN/mb). Tež sydom delegatow za hłownu zhromadźiznu 5. apryla w Budyšinje, kiž ma wjednistwo třěšneho zwjazka znowa wolić, su wčera postajili. To je županka Gabriela Linakowa našemu wječornikej wobkrućiła. Wona ma tuchwilu wosebje přihoty na saksku krajnu domchowanku na starosći, kotraž so wot 12. do 14. septembra we Wojerecach wotměje. Přichodnu póndźelu w 17 hodź. přeprosy Linakowa na druhe zeńdźenje ze serbskimi towarstwami, kotrež chcedźa so tam wobdźělić. Serbja budu na wšěch třoch jewišćach – při Łužiskej hali, před Léona Foucaultowym gymnazijom a na torhošću w starym měsće – wustupować. Za swjedźenski ćah planuja serbski blok ze wšelakimi wobrazami, a na zelenej mili budu serbske informaciske stejnišća, na přikład župy a syće za serbsku rěč a regionalnu identitu ZARI.
Hłowna zhromadźizna a ekstremizm
Budyšin (SN/bn). Wustawkam Domowiny wotpowědujo wuradźowachu wčera předsyda třěšneho zwjazka a županki a županojo kaž tež předsydźa a předsydki čłonskich towarstwow a zwjazkow w Budyskim Serbskim domje. Ćežišćo bě hłowna a wólbna zhromadźizna, kotraž wotměje so 5. apryla w Budyšinje. Mjez druhim rozłožištaj předsyda Domowina Dawid Statnik a jednaćelka třěšneho zwjazka Judit Šołćina přiměrjenja dźěłowych směrnicow, kotrež maja so na njej schwalić, wudospołnjenja wustawkow, kotrež buchu mjeztym prawnisce pruwowane, a procedere wólbow. Tak ma so kruće do wustawkow zapisać, zo přisteji kóždemu čłonskemu towarstwu znajmjeńša jedne městno w zwjazkowym předsydstwje Domowiny. Dalše sobustawojo tohole gremija wobsadźuja so proporcionalnje po ličbje čłonow jednotliwych zwjazkow/župow. Drje najwažniša změna nastupa tak mjenowanu klawslu ekstremizma.
W Delnjej Łužicy sylna młodźina
Domowinska župa Delnja Łužica je minjeny pjatk swoje nowe župne předsydstwo wuzwoliła, kotrež ma dźěło župy přichodne štyri lěta nawjedować. Na zhromadźiznje wobdźělichu so 50 delegatow a dalši hosćo.
Žylow (HA/SN). Cyłkownje 13 čłonow su na 33. hłownej zhromadźiznje do předsydstwa wuzwolili. Mjez nimi je sydom nowych a tójšto młodych čłonow. Za funkciju přichodneho župana abo županki pak so nichtó přizjewił njeje.
Wotpowědnje rozprawje župneho předsydstwa je ličba čłonow, skupinow a towarstwow loni dale přiběrała. Tak maja cyłkownje nimale 2 800 čłonow w 31 Domowinskich skupinach a 23 towarstwach a zjednoćenstwach. Wosebje horda je župa na to, zo ma nětko na wšěch 600 čłonow w 12 młodźinskich Domowinskich skupinach. Z tym je župa Delnja Łužica mjez pjeć župami we Łužicy dale najwjetša.
Dobra wuměna w Delnjej Łužicy
Choćebuz (SN). Župan župy Delnja Łužica dr. Pětš Šurman a regionalna rěčnica Heike Apeltowa staj so wčera w Choćebuskim Serbskim domje ze zamołwitymi za serbske naležnosće zetkałoj. To běchu Romy Ruffowa za wokrjes Sprjewja-Nysa, Hanka Rjelcyna (Hornje Błóta-Łužica), Sabrina Kušcyna (Dubja-Błóta) a Ana Kosacojc-Kozelowa (město Choćebuz). Tajke wuradźowanje so dwójce wob lěto wotměwa. Župan so nad dobrej wuměnu ze zamołwitymi wjeseleše, wšako so wone tež na zetkanjach župneho předsydstwa wobdźěleja a swoje dźěło předstajeja.
Aktualnje su so mjez druhim wuwiću na polu šulstwa w Choćebuzu wěnowali. Tule dźěše znowa wo sćěhi za profil Delnjoserbskeho gymnazija w zwisku z hrožacym rozšěrjenjom přez štwórtu rjadownju w kóždym lětniku (SN rozprawjachu). Dalša tema běše, kak so zajimcam informacije wo Serbach a serbskej rěči posrědkuja. Zamołwite su za to małe přednoški přihotowali, dalše móžnosće poskićujetej Šula za delnjoserbsku rěč a kulturu a Serbski institut.
Kandidaća za Serbski sejm so předstajeja (2)
Tomaš Čornak (HŁ)
dźěławosć/powołanje: přistajeny
narodźeny: 1963
bydlišćo: Njebjelčicy
towarstwo: SOWUTU
Jako něhdyši čłon wokrjesneho sejmika Budyšin a sakskeje serbskeje rady dožiwich, zo smy stajni próstwustajerjo za serbske naležnosće. Jako kandidat druheje legislaturneje periody steju za to, zo so prawa a struktury kaž tež zajimy Serbow samostatnje přez serbski sejm rjaduja. Kulturna a kubłanska awtonomija kaž tež wuwiwanje regionalneho koncepta serbskeho ludu leži mi na wutrobje.
Dieter Reichelt (HŁ)
dźěławosć/powołanje: dipl. filozof, dipl. socialny dźěłaćer/pedagoga
narodźeny: 1951
bydlišćo: Berlin
towarstwo: SOWUTU
Narodźeny 1951, sym w Rakojdach wotrostł a z toho časa Serbstwo znaju. Moja mać rěčeše serbsce, sym rěč w Bartskej šuli někotre lěta nawuknył. Sym sej wěsty, zo je bazowe demokratiske zastupnistwo serbskich wobydlerjow a wobydlerkow trěbne. Jich prawa we wustawje měli Serbja sebjewědomje w zjawnosći zastupować.
Rüdiger Žur (HŁ)
dźěławosć/powołanje: chórowy spěwar
narodźeny: 1967
bydlišćo: Chrósćicy
Kandidaća za Serbski sejm so předstajeja (1)
dr. Hagen Domaška (HŁ)
dźěławosć/powołanje: biologa
narodźeny: 1975
bydlišćo: Drježdźany
towarstwo: krajny dźěłowy kruh „Serbske žiwjenje“, Zwjazk 90/Zeleni Sakska
Sym 49 lět stary a dźěłam jako wědomostnik w Drježdźanach. Za moje domizny Wojerecy, Drježdźany a Łužicu angažuju so politisce w dostojnstwje. Chcu docpěć, zo móže serbski lud při wužiwanju wody, kraja a surowiznow sobu rozsudźeć a sam wo serbskim kubłanju a serbskej kulturje postajeć. Tohodla: Sej wjace demokratije zwažić!
Marc Sturm (HŁ)
dźěławosć/powołanje: inženjer, samostatny
narodźeny: 1984
bydlišćo: Budyšin
towarstwo: Łužiska Alianca
Nowych čłonow witali
Budyšin (LTh/SN). Čłonojo Towaršnosće za spěchowanje SLA zetkachu so minjeny pjatk w něhdyšej Budyskej kehelerni, w nětčišej Budyskej piwarni. Dokelž bě předsydka Jěwa-Marja Čornakec schorjeła, je sej wona wšitko trěbne hižo w předpolu z wjednistwom towarstwa wotrěčała a rozprawu dźěławosće swědomiće přihotowała. Po tutej a finančnej rozprawje přizamkny so žiwa diskusija. Mjez druhim rěčachu wo nowej chronice ansambla, kotraž ma z pomocu towarstwa składnostnje 75. narodnin SLA wuńć. Dalše projekty ansambla stejachu w srjedźišću diskusije, mjez druhim nowa galerija intendantow, digitalny archiw ansambla a tři předstajenja oratorija Nalěćo w aprylu 2026 zhromadnje z chórami Lipa, Meja a Budyšin.
Towarstwo witaše do swójskich rjadow nowych čłonow kaž Rejzku Krygarjec, Ullricha Pogodu a Bena Brězana. Dale wuzwolichu čłonojo dweju delegatow za hłownu zhromadźiznu Domowiny (Jurija Łušćanskeho a Jěwu-Marju Čornakec) a wobkrućichu jednohłósnje kandidaturu Jěwy-Marje Čornakec za Zwjazkowe předsydstwo Domowiny.
