Serbske blido za Domowinu
Pětš Petrik, projektowy sobudźěłaćer Domowiny, wabi tuchwilu čłonow towarstwa a přećelow serbskeje rěče a kultury, załožić Serbske blido we Wojerecach. Jeho zaměr je žiwjenje serbskeho naroda zachować, je pisaniše sčinić, serbsku zhromadnosć dožiwić a hajić. Tradicije měli so wědomišo pěstować a zdźěla znowa wotkryć. „Mnoho je so z industri- alizaciju za čas NDR zhubiło. Mamy pak hišće serbskich burow, kotřiž su sej tradicije w pomjatku wobchowali. Serbske blido ma tomu dopomhać, zo so wo tym rěči. Zetkanja maja być medicina přećiwo zabyću a měli posrědkować mjez młodźinu a staršej generaciju“, Pětš Petrik rozłožuje. Wotměje-li so zarjadowanje, měli so wobdźělnicy jeno serbsce rozmołwjeć. Tón, kiž za blidom sedźi, měł serbski narod přeswědčiwje zastupować.
Zasady mytowanja zjednorjene
Budyšin (SN/JaW). Mytowanski wuběrk Zwjazkoweho předsydstwa Domowiny je swój jednanski porjad změnił, kaž su Serbske Nowiny rešeršowali. Tak bě wuběrk pod nawodom Brigity Šramineje loni nazymu směrnicy k spožčenju kóždolětneho Myta Domowiny a Myta Domowiny za dorost zjednorił, časej přiměrił a zdobom zadźěwk wotstronił. Lětsa tuž prěni króć wo lawreatach Myta Domowiny po nowych zasadach rozsudźa.
Dotal móžachu towarstwa a jednotliwcy swojich kandidatow jenož trójce namjetować. Njeběchu-li wšitke pospyty na počesćenje wuspěšne, njeměješe namjetowana wosoba čas žiwjenja šansu Myto Domowiny dóstać. Po změnje jednanskeho porjeda mytowanskeho wuběrka tónle zadźěwk hižo njewobsteji. Tak maja wšitcy, kotřiž čestnohamtsce „ze wšoserbskim wuznamom na wšěch polach narodneho dźěła skutkuja“, móžnosć na počesćenje, wšojedne, kelko króć buchu namjetowani. Jeničke wuměnjenje je, zo je mjez třećim a štwórtym namjetowanjom mała přestawka. Tole wobkrući našemu wječornikej přisłušny zamołwity Domowinskeho zarjada za mytowanski wuběrk Clemens Škoda.
Pětr Cyž dale na čole ZSST
Radwor (SN/JaW). Zhladujo na zašłej lěće je Zwjazk serbskich spěwarskich towarstwow (ZSST) mjenje zhromadnych projektow přewjedł hač lěta do toho. Tole zwěsći dotalny a nowy předsyda ZSST Pětr Cyž na pjatkownej hłownej a wólbnej zhromadźiznje w Radworskej Meji. „Předsydstwo je so cyle wědomje za to rozsudźiło. Po tym zo bě w zašłej dobje tójšto projektow mocy płaćiło a zhladujo do přichoda na koncertaj w juniju 2016 składnostnje znowazałoženja ZSST před 25 lětami a na předstajenje oratorija „Israelowa zrudoba a tróšt“ 2017 smy sobustawskim chóram swobodu dali, so sylnišo swójskemu dźěłu wěnować, takrjec wodychnyć a mocy za dalše zhromadne předewzaća čerpać“, Cyž rozłoži.
Tež kubłanske naležnosće rozjimali
Malešecy (kl/SN). Předsydstwo Budyskeje župy „Jan Arnošt Smoler“ je so wčera w Malešecach wo spěchowanju serbskeje rěče w tamnišej gmejnje a wo kubłanskich prašenjach dorozumiło. Přitomni běchu tež Malešanski wjesnjanosta Matthias Seidel (CDU), nawodnica tamnišeje Witaj-pěstowarnje Borbora Kralowa, direktor Bartskeje zakładneje šule Michael Biskop a čłonojo předsydstwa Malešanskeje Domowinskeje skupiny.
Přitomni zwěsćichu, zo matej pěstowarnja a šula wulki podźěl na hajenju serbšćiny w komunje. Zo by tomu tak wostało, poskića wot přichodneho šulskeho lěta zaso kurs serbskeje rěče staršim, kotřiž swoje dźěći do Witaj-pěstowarnje sćelu. Tajke kursy běchu tam hač do lěta 2011 prawidłownje přewjedowali. Rěčny centrum WITAJ přewostaji za to material a rjaduje płaćenje. Gmejna přewostaji za kurs zaso rumnosć w Malešanskej srjedźnej šuli. Zaměr je serbsku rěč a kulturu w gmejnje a předewšěm we wokolinje pěstowarnje wědomje skrućić.
Za jězbje hišće swobodne městna
Wulke Ždźary (SN/MWj). Lětuši, nětko 14. Krabatowy swjedźeń 26. julija steji cyle w znamjenju přibliženja wšelakich europskich regionow. Mjeztym zo wotměwachu so dotalne swjedźenje we Łužicy, přewjedu jón tónraz w chorwatskim Žumberaku njedaloko słowjenskeje hranicy, hdźež bě domizna Jana Šajatowica (Šadowica). Załožili su tam mjeztym hižo dwě regionalnej Krabatowej towarstwje, kotrejž lětuši swjedźeń hłownje přihotujetej.
Přiwšěm chce tež hornjołužiske Krabatowe towarstwo k poradźenju přinošować a so z prawje wjele zajimcami do Chorwatskeje podać. Za to planuja dwě jězbje. Kaž předstajer Krabata Wolfgang Kraus z Wulkich Ždźarow wobkrući, maja hišće swobodne městna. „Spočatnje bě jedyn bus předwidźany, kotryž je mjeztym dawno połny. Planujemy tuž dwaj busaj. Dyrbjało-li pak so dosć zajimcow přizjewić, wobstaramy tež třeći“, rozłoži Wolfgang Kraus. Wón přilubi, zo kóždy, kiž chce sobu jěć, městno dóstanje, wšako so hišće wjacore priwatne awta na puć do Chorwatskeje nastaja.
Wo wusměrjenju rozmyslować
Konjecy (SN). Z 20 wustupami bě lěto 2014 za Serbski muski chór Delany dosć wuspěšne. „Ličbu předstajenjow smy stopnjowali, kaž běchmy sej to předewzali“, rjekny dotalny a nowy předsyda spěwneho cyłka Janek Wowčer na wčerawšej hłownej a wólbnej zhromadźiznje w Konječanskej Burskej stwě. Jednohłósnje běchu čłonojo jeho w zastojnstwje wobkrućili. Nimo Wowčerja a wuměłstwoweho nawody Handrija Henčla přisłušeja znowawuzwolenemu předsydstwu Daniel Wjesela, Měrko Korjeńk, Bjarnat Brankačk, Alfons Budar a Alojs Langa.
Počesća Manfreda Laduša
Budyšin (SN). Serbski žurnalist, publicist a kulturny stawiznar Manfred Laduš z Wětrowa dóstanje lětuše Myto Ćišinskeho Załožby za serbski lud. Tole je kuratorij k spožčenju myta na swojim wčerawšim posedźenju w Budyšinje rozsudźił. 1941 w Hermanecach rodźeneho wuznamjenja za jeho wurjadny žiwjenski skutk jako kulturny stawiznar, awtor, chronist, referent, fachowy poradźowar, dokumentarist, narodny prócowar a pozbudźer. Z jeho pjera wuńdźechu njeličomne přinoški, brošurki a knihi.
Za spěchowanske myto namjetowany bu delnjoserbski komponist Sebastian Elikowski-Winkler. 1978 rodźeneho Choćebužana, kiž bydli w Berlinje, počesća za jeho kompozitoriske tworjenje, hudźbno-wědomostne a hudźbno-organizatoriske skutkowanje a šěrjenje wědy wo serbskej hudźbje a kulturje w kraju a wukraju, rěka we wopodstanjenju.
Swjedźenske zarjadowanje k spožčenju Myta Ćišinskeho budźe 17. oktobra na Čerwjenej žurli klóštra Marijineje hwězdy w Pančicach-Kukowje.
Wuchadźišćo idejow na dobro delnjołužiskich Serbow
Choćebuski Serbski dom steješe minjeny tydźeń w srjedźišću serbskeho a Domowinskeho žiwjenja Delnjeje Łužicy. 25 lět wobsteji politiske, kulturne a wědomostne srjedźišćo delnjołužiskich Serbow.
Choćebuz (HA/SN). Wjeršk jubilejneho tydźenja bě pjatk dopołdnja swjedźenske zarjadowanje, na kotrež přichwatachu politikarjo z Podstupima, Budyšina a Choćebuza. Župan župy Delnja Łužica Harald Koncak rysowaše stawizny domu. Wón zhladowaše na jeho nastaće a 25lětne wuwiće k wažnej instituciji, z kotrejež přeco zaso wuchadźeja nowe ideje a impulsy za serbsku rěč a kulturu. Koncak naspomni prócowanja Domowiny, zo bychu delnjołužiscy Serbja za swoje dźěło swójski dom dóstali.
Wulki dźak wólbnemu wuběrkej
Po wuzwolenju noweje Rady za serbske naležnosće w Krajnym sejmje Braniborskeje minjenu njedźelu hódnoćeše předsydstwo Domowinskeje župy Delnja Łužica wčera wotběh a wólbne wuslědki.
Choćebuz (HA/SN). Na posedźenju gremija w Choćebuzu je župan Harald Koncak wuzběhnył, zo běchu wólby jara wuspěšne. Za to mjenowaše wšelake přičiny: Wólby běchu njewotwisnje wot stata a stron přihotowane a přewjedźene. Wšitcy Serbja, kotřiž bydla w Braniborskej, móžachu so na nich wobdźělić. Serbske, w kraju skutkowace towarstwa mějachu składnosć, swojich kandidatow nominować. Nic wšitcy, ale nahladna ličba serbskich wobydlerjow je to wužiwała a demokratisce sobu rozsudźiła. Kaž Koncak podšmórny, je Domowina při tym wažnu rólu hrała. Rozdźěle nastupajo ličbu docpětych hłosow mjez wosom nastupjenymi kandidatami njejsu tajke wulke. Župan ma to za wuraz, zo běchu wšitcy kandidaća mjez wolerjemi připóznaći.
Prěni króć pódla
Drježdźany (SN/MiR). Drježdźanske towarstwo Stup dale wobdźěli so lětsa prěni króć na woblubowanym swjedźenju při Łobju (Elbhangfest). Wot 26. do 28. junija chce wone njedaloko Konsuma na něhdźe tři kilometry dołhej swjedźenskej čarje mjez Łóškecami (Loschwitz) a Běłnecami (Pillnitz) swoje stejnišćo natwarić. Hižo wotdaloka budźe ze serbsko- a němskorěčnym plakatom kaž tež ze serbskej chorhoju na so skedźbnjeć.
„Łóškecy swjeća lětsa 600. jubilej prěnjeho naspomnjenja sydlišća“, rozłožuje čłonka towarstwa Stup dale Bianka Šwejdźic, „chcemy Drježdźanjanam a jich hosćom wuwědomić, hdźe tež dźensa w sakskej stolicy Serbja bydla. Zbližić chcemy jim našu pěstowarsku a dnjowu skupinu a pokazamy zdobom na serbske korjenje wsy Łóškecy.“
Přihotowali su sej štyrjo organizatorojo sami a z pomocu Rěčneho centruma WITAJ material, swědčacy wo słowjanskim pochadźe swójbnych a městnych mjenow kaž tež wo serbskich słowach, kotrež so w regionalnym dialekće jewja. Zdobom chcedźa předawać samopaslene wobalki a karty.
