Budyšin (SN/CoR). Serbske šulske towarstwo je mjena kandidatow za přichodne předsydstwo na swojej internetnej stronje https://www.sorbischer-schulverein.de/hs wozjewiło.
K wólbam nastupja wučerka Choćebuskeho Delnjoserbskeho gymnazija Jenifer Dünnbierowa, wučer a wučerka Budyskeho Serbskeho gymnazij Roman Grzyb a Alena Hiccyna kaž tež wučer a referent w sakskim ministerstwje za kultus Beno Hojer, regionalna rěčnica Domowiny za teritorij župy Kamjenc Katharina Jurkowa, diplomowa zawodna hospodarka Kathleen Komolcyna, wučer Ralbičanskeje Serbskeje wyšeje šule Jan Rjeda a wučerka Radworskeje Serbskeje wyšeje šule „Dr. Marja Grólmusec“ Diana Wowčerjowa. W krótkowidejach so jednotliwcy předstajeja. Kónc lěta chce SŠT swojim čłonam listy za wothłosowanje pósłać a 23. januara hłosy wuličić.
Ludmila Budarjowa, kotraž je towarstwo po politiskim přewróće sobu załožiła a wjacore lětdźesatki nawjedowała, runja někotrym dalšim k wólbam hižo njenastupi. Klětu zhladuje SŠT na 30. róčnicu swojeho załoženja.
Budyšin (SN/JaW). Hłownu a wólbnu zhromadźiznu Domowiny, kotruž planuja za 27. měrc 2021 w Slepom, měli do lěća přestorčić. To je wčera předsyda třěšneho zwjazka Dawid Statnik na onlinowym wuradźowanju prezidijej zwjazkoweho předsydstwa namjetował. A prezidij poručenje předsydy podpěruje. Doskónčnje wo tym rozsudźić chce Zwjazkowe předsydstwo Domowiny na swojim jutřišim posedźenju, kotrež móža zajimcy pod www.youtube.com/watch?v=KYEss6x5wjc&feature=youtu.be live sćěhować. Jako hłownu přičinu, hłownu zhromadźiznu přestorčić, mjenuje Domowina koronapandemiju.
Njebjelčicy/Budyšin (SN/JaW). Spěchowanske towarstwo SMY z.t. je Załožbje za serbski lud próstwu wo institucionelne spěchowanje jednaćelnje Serbskeho sejma zapodało. Tak chce skutkowanje gremija zaměrnje podpěrać, pisa towarstwo w nowinskej zdźělence.
„Wulke wužadanja před nami ležacych nadawkow so hladajo na trěbnu kwalitu a přaty časowy ramik za serbski lud z ryzy čestnohamtskim dźěłom zmištrować njedadźa“, měni pokładnica towarstwa SMY a zapósłanča Serbskeho sejma Aneta Zahrodnikowa. Dale w zdźělence mjez druhim rěka, zo so wšitcy zapósłancy Serbskeho sejma „bjezwuwzaćnje bjez zapłaćenja a zwonka powołanskeho dźěła angažuja“. Kaž towarstwo SMY tohorunja připowědźa, předstaji swój „koncept čłonam załožboweje rady na jich posedźenju“.
Kaž direktor Załožby za serbski lud Jan Budar wobkrući, próstwa wo institucionelne spěchowanje jednaćelnje Serbskeho sejma „wot wutory našemu zarjadej předleži. Na wuradźowanju załožboweje rady přichodnu wutoru pak naležnosć na dnjowym porjedźe njesteji.“
Smjerdźaca (aha/SN). 20. raz je Towarstwo swj. Filomeny z předsydu Geratom Róblom na čole lětsa w dohodownym času za nuzu ćerpjacych pakćikowu akciju přewjedło. Wčera je sej wulke nakładne awto z Bołharskeje do Smjerdźaceje dojěło. Wjele pomocnikow su dźensa dopołdnja něhdźe 700 darjenych pakćikow kaž tež wot Kamjenskeje wotnožki Carity přewostajene wjetše mnóstwo hygieniskich srědkow za wobydlerjow starownjow a samo nimale nowe koleso za zbrašene dźěćo kaž tež pjeć wulkich měchow muki ze Sulšečanskeho Brězanec młyna nakładowali. Dźensa je so Lkw na daloki puć do Bołharskeje nastajił. Pakćiki do maćerno-dźěćaceju domow w čěskim Jiřetínje a Dolním Podluží dowjeze Gerat Róbl jutře z transporterom. W domje w Dolním Podluží bydli tuchwilu dźesać maćerjow z dohromady 14 dźěćimi. W Jiřetínje je jich wjace hač dwójce telko. Kóžda mać dóstanje pakćik, kotryž su darićeljo za swójbu postajili a kóžde dźěćo, hač hólc abo holca, starobje wotpowědny pakćik.
Hody pola nas doma. Kak je swjećimy? Prašenje to, z kotrymž chce so Drježdźanske towarstwo Stup dale zaběrać. Aktualny zakaz wosobinskeho zetkawanja mjezsobne zwiski serbskich swójbow w sakskej stolicy poćežuje. Tuž nětko po digitalnym puću styki pěstuja.
Budyšin (pdź/SN). Dokładnje dwě lěće po prezentaciji prěnjeje wersije předstaji towarstwo Serbska murja na lětušej schadźowance dospołnje předźěłanu wersiju swojeje hry QuizSerb. Wona je prěnja zjawnje přistupna digitalna kwisowa hra w hornjoserbskej rěči. Wona hodźi so pak přez browser w syći pak jako aplikacija na mobilnych nastrojach wužiwać. „Smy wot wšeho spočatka wjele pozitiwneho wothłosa žnjeli“, zdźěli Syman Sćapan, nawoda projekta, spěchowaneho přez Załožbu za serbski lud. „To bě nam pohon, aplikaciju wobstajnje dale wuwić. Nowa wersija z duelowym modusom, kotryž su sej mnozy wužiwarjo přeli, je wupłód našich prócowanjow.“
Wón je po podaću Domowiny prěni mytowany z ewangelskeje narańšeje kónčiny Łužicy. A tam „je so w zašłych lětach wjele stało“, rěkaše minjeny měsac na žurli Budyskeho Serbskeho domu w lawdaciji k spožčenju Čestneho znamješka Domowiny myta Friedhardej Krawcej.
Rodźeny Lubijčan a nětko w Swóńcy (Großschweidnitz) bydlacy je sej hakle zašłe dźesać lět swoje a serbske korjenje swojeje swójby wotkrył. Mjeztym so jako Serb wuznawa a, kaž našemu wječornikej wobkrući, so tež jako tajki čuje. Serbšćinu je nawuknył na rěčnym kursu za němskich staršich kaž tež na ferialnym kursu Budyskeho Serbskeho instituta a ze swójskeje iniciatiwy.
Budyšin (SN/at). Nimo informacijow generalneje sekretarki FUEN Évy Adél Pénzes steješe na wčerawšim online-seminaru dźěłoweje skupiny słowjanskich mjeńšin FUEN skutkowanje tohole gremija w srjedźišću. Kaž wobdźěleny referent Domowiny za kulturu a wukraj Clemens Škoda rozprawja, předstaji koordinator FUEN-skupiny Matic Germovšek rozprawu, nowu brošurku a webstronu, kotraž ma wotnětka informacije zběrać a słowjanske mjeńšiny hišće sylnišo ze sobu splesć. Najebać koronapandemiju hódnoći wón dźěławosć skupiny jako pozitiwnu.
We wobłuku wobšěrneho rozprawnistwa ze słowjanskich mjeńšin je so za Serbow Bjarnat Cyž słowa jimał, dalši serbski wobdźělnik bě Frank Kosyk.
Skutkowanje dźěłoweje skupiny w lětomaj 2021 a 2022 nastupajo FUEN planuje, so situaciji pandemije přiměrić a spočatnje na region wobmjezowane zetkanja słowjanskich narodnych mjeńšin wotměć. Budźe-li kónc lěta 2021 hižo móžno, chcedźa přichodny FUEN-seminar w Italskej přewjesć. Za přichodne zetkanja pak dyrbi najprjedy internet dale słužić.
Wojerowska župa „Handrij Zejler“ namołwja k tomu, wubědźować so w předstajenju bajkow a powěsćow. Zwoprawdźić měli to z pomocu kamishibai, wosebiteho wašnja dźiwadźelenja.
Budyšin (SN/MiR). W Čornochołmčanskim Krabatowym młynje hižo dlěje po tymle wašnju dźiwadło na blidźe hraja, a to baju wo Krabaće. Tež Weronika Butendeichowa z Rěčneho centruma WITAJ kamishibai rady wužiwa. „Mam tele wašnje dźiwadźelenja za jara wunošne, wosebje za dźěło z Witaj-dźěćimi. Jara dobra wopokaza so stajnje zaso kombinacija mjez hrajacym powědarjom a wobrazami, kotrež so do drjewjaneho ramika staja a tak powědane ilustruja“, sobudźěłaćerka RCW rozłožuje.