Hodźij (KřK/SN). Z kěrlušom „Pój, wutroba, a wjesel so!“ zahaji so srjedowny spěwny wječork na Hodźijskim kantoraće. 21 zajimcow w starobje 14 do 84 lět bě přeprošenje tamnišeje Bjesady a jeje nawody dr. Gerata Krawca z Delnjeho Wunjowa sćěhowało, mjez nimi hosćo Rakečanskeje Bjesady. Po tym zo je dr. Krawc wšitkich wutrobnje witał a Ochranowske hesło dnja k rozmyslowanju podał, so přitomni w kole skrótka mjez sobu předstajichu. Na to z wulkim wjeselom ludowe spěwy zanošowachu. Pod přewodom gitary a pišćałki ewangelscy a katolscy wěriwi kaž tež njewěriwi přećeljo znate serbske štučki spěwachu, wot Domčka lubeho přez Hanku syrotu a Přeco ty chodźiš hač k Ptačim ćaham. Sčasami klinčeše, kaž by tam dwu- abo třihłósny chór swój program předstajił. Jednotne měnjenje na kóncu rěkaše: „Za nas je tele spěwanje podawk, na kotryž njezabudźemy. Bychmy so rady husćišo zetkawać chcyli.“
Po wjacore měsacy trajacej přestawce zetkachu so Drježdźanscy Serbja wutoru k swojemu stajnemu blidu w Drježdźanskim hosćencu „The Red Rooster“ (Čerwjeny honač). Přichodnje chcedźa Serbske blido w rytmusu dweju měsacow wotměwać.
Drježdźany (SN/MiR). Kaž ze słowow předsydki Drježdźanskeho towarstwa Stup dale Jadwigi Pjacec wuchadźa, běchu so Serbja w sakskej stolicy za zetkanjom žedźili. „Dźewjeć wosobow je nětko přišło“, wona na naprašowanje SN rjekny, „a wšitcy začuwachu, zo bě to najwjetši čas. Na tajkich wječorkach so wobstejace styki mjez Drježdźanskimi Serbami jenož njeskrućeja, ale zdobom so tež nowe zwiski wuwiwaja.“ Wothłós na Serbske blido přiběra. Bohužel pak dyrbjachu tónkróć mnozy druhich terminow dla wotprajić. Dalši běchu so korony dla zamołwili. „Hewak zwěsćamy, zo so dale a wjac nowych zajimcow krutemu zdónkej přidruža“, Jadwiga Pjacec zwurazni.
Budyšin (kl/SN). Přichodne předewzaća a projekty rozjimachu čłonojo předsydstwa župy „Jan Arnošt Smoler“ na swojim wčerawšim posedźenju. Župa chce planowanu kubłansku jězbu w septembrje do bliskeje wokoliny do směra na Wóspork a Hrodźišćo přewjesć. Wuklinčeć ma zarjadowanje za čłonow župy w Njechornju ze serbskim programom.
Podpěrać chcedźa čłonojo župneho předsydstwa serbski wječor, kotryž ma so w awgusće na zahrodźe SLA w Budyšinje wotměć.
Runje tak stej serbske kulturne lěto w Liberecu a tamniše towarstwo SAL za Budysku župu zajimawej. K wotewrjenju wustajeńcy w nowembrje chcedźa zmóžnić, zo sej čłonojo tam dojědu.
Za jubileje klětu a w lěće 2022, kotrež je zdobom lěto Zejlerja a Smolerja, zběrachu přitomni prěnje ideje. Woni maja za hódne, Michała Rostoka a Jana Mučinka na přikład z přednoškom wopominać.
Motiwator Lucian Kaulfürst rozprawješe wo swojim skutkowanju. Podpěrać budźe wón młode swójby w Malešecach při zwoprawdźenju projekta, z kotrymž su we wubědźowanju „Čiń sobu!“ dobyli.
Tradicionalnemu mejemjetanju w Hornjej Łužicy su wobmjezowanja koronapandemije dla zadźěwali. Tež nastupajo žnjowe nałožki, kaž stej to łapanje abo zabiwanje kokota, su sej młodostni w delnjołužiskich wsach njewěsći. Njedawno je so braniborska Rada za naležnosće Serbow z temu zaběrała.
Podstupim (SN/at). W cyłkach delnjołužiskeje wjesneje młodźiny bědźa so hladajo na koronapandemiju lětsa z prašenjomaj, kotrejž jim hewak žane hłowybolenje njenačinjatej: Wotmějemy swoje tradicionalne žnjowe nałožki? A kotre wuměnjenja mamy za to spjelnić?
Kaž radźićel a župan župy Delnja Łužica Wylem Janhoefer wuwjedźe, njeje dotal rjadowane, kak maja młodostni swoje zarjadowanja financować. Pod normalnymi wobstejnosćemi zaruča předań zastupnych lisćikow za wječorne reje wšitke kóšty tajkeho žnjoweho swjedźenja. Po tuchwilu płaćiwym braniborskim postajenju wo zadźerženju w dobje koronapandemije pak su reje na žurli dale zakazane. Předsydka rady Kathrin Šwjelina młodostnych namołwi kreatiwni być, zo bychu swoje zarjadowanje zaručili.
W zhromadnym dźěle z Domowinu a Budyskim Serbskim institutom je Dźěłarnička přichod Łužica nowu brošurku wudała. Z nadrobnym wopisowanjom serbskosće we Łužicy chcedźa wjace ludźi do Łužicy wabić.
Mužakow (SN). Dźěłarnička přichod Łužica je njedawno pod titulom „Lausitz Łužyca/Łužica Die Sorben/Wenden – verbinden die Lausitz“ nowu brošurku wudała. Kaž Domowina w nowinskej informaciji piše, kroča wudawaćeljo – towaršnosć Hospodarski region Łužica – „z njej po nowych pućach“. Wšako móža so nětko zajimcy „zwonka Łužicy, ale tež naši susodźa we Łužicy, kotřiž Serbow hišće njeznaja, na nazorne a přehladne wašnje w internetnje přistupnej brošurce wo Serbach wobhonić“, zdźěli nowinski rěčnik Domowiny Marcel Brauman.
Drježdźany/Njebjelčicy (SN/at). Na demonstraciju składnostnje słyšenja w Sakskim krajnym sejmje wo přichodźe wot wotbagrowanja wohroženych wsow Pödelwitz, Obertitz a Miłoraz namołwja BUND Sakskeje hromadźe ze zwjazkarstwom „Wšitke wsy wostanu“ a Ende Gelände Drježdźany na protest jutře w 13 hodź. před parlamentom w sakskej krajnej stolicy.
Sydom čłonow Serbskeho sejma je so namołwje přizamknyło. Woni žadaja sej mjez druhim zachowanje tych třoch wsow, kotrež maja so do strukturneje změny zapřijeć, klimowu sprawnosć město wotškódnjenja brunicowym koncernam. Runje tak je sejmarjam wažne wobydlerjow před emisijemi Wochožanskeje jamy škitać, zachować wysoki lěs Rownjanskich burskich lěsow, škitać tři lěsne biotopy, wuchować mjezyłuku za skót. Zachować maja so z wida Serbskeho sejma dale Miłoraska dróha, přirodne wódne zastaranje w přirodoškitnymaj kónčinomaj Slepjanski Stary wulki hat a Trjebinski zwěrjenc. Jich žadanja poćahuja so zdobom na zawjedźenje lětneho monitoringa wody w Slepjanskej gmejnje.
Budyšin (SN/JaW). Zhromadne dźěło čłonskich słowjanskich narodnych mjeńšin w Federalistiskej uniji europskich mjeńšin FUEN so krok po kroku normalizuje. Wo tym informuje Domowina w medijowej zdźělence.
Zastupnicy dźěłoweje skupiny słowjanske mjeńšiny (ASGM) wuradźowachu tón tydźeń online. Jedne z ćežišćow wuradźowanja běchu přihoty na FUEN-kongres a zetkanje dźěłoweje skupiny słowjanskich mjeńšin w oktobrje. „Matic Germovšek, korutanski Słowjenc a koordinator dźěłoweje skupiny, rozprawješe tež wo postupach noweje internetneje strony a brošurce wo słowjanskich mjeńšinach w Europje, kotraž leži nětko w rukach FUEN“, w zdźělence dale rěka. Zdobom dźakowachu so na digitalnym wuradźowanju wuraznje Serbam, Domowinje a předewšěm Bjarnatej Cyžej, „kiž je lěta dołho jako rěčnik skupiny jeje dźěławosć bytostnje přewodźał a zmóžnjał“. Referent Domowiny za kulturu a wukraj Clemens Škoda so wjeseli, „zo je normalne skutkowanje Słowjanow w FUEN pod wuměnjenjemi pandemije zaso zahajene.“