Horliwje prócuje so wón za wšo serbske a angažuje so tuž w najwšelakorišich wobłukach serbskeho žiwjenja. A to nic jenož w Budyšinje, ale tež na wokolnych wsach. Serbska rěč a kultura stej jemu naležnosć wutroby a tak je w Budyšinje lětsa najwjace podpismow za akciju skrućenja mjeńšinowych prawow na europskej runinje Minority SafePack nazběrał. Rěč je wo Lucianu Kaulfürsće. Za wobšěrne skutkowanje počesći jeho Domowina lětsa z Čestnym znamješkom.
Lucian Kaulfürst kroči njekonwencionelne puće, zo by serbskorěčne rumy tworił a zachował. Tak je „we wobłuku praktikuma pola Carity w sprjewinym měsće, kotryž wukonješe za čas swojeho dalokostudija, zwiski k staršim serbskim ludźom nawjazał, z nimi serbsce rěčał a spěwał, štož jich widźomnje zwjeseli“, wuzběhny předsydka Mytowanskeho wuběrka Domowiny Leńka Thomasowa w lawdaciji na počesćenju w Budyskim Serbskim domje. Podpěrał je mjez druhim jedne cyłe šulske lěto Slepjanskich šulerjow, kotřiž wuknjechu na Serbskim gymnaziju w Budyšinje, přiswojić sej hornjoserbšćinu.
Po tym zo je Serbskopazličanske karnewalowe towarstwo wčera tydźenja do noweje póstniskeje sezony startowało, dožiwi wone sobotu z wólbu noweho princa swój prěni wjeršk. A tón bě we wjacorym nastupanju chětro turbulentny.
Njebjelčicy (AKr/SN). Kaž kóžde lěto so tež sobotu w Njebjelčanskej „Bjesadźe“ prašachu, štó drje budźe lětsa nowy princ. Wšitko je dźě jara tajne. Kaž bě wot zamołwiteho za pytanje princa Chrystofa Cyža zhonić, bě lětsa jara ćežko zwólniweho za zastojnstwo namakać. Takrjec na posledni wokomik je wón tola kandidata našoł. Na derje pjelnjenej žurli „Bjesady“ dožiwichu wopytowarjo najprjedy rjany a wotměnjawy program. Dźak wupraji prezident towarstwa Daniel Wätzig dotalnemu princowskemu porej Jensej I. a Sylviji I. kaž tež dźěćacemu princej Richardej za rjane lěto regentstwa. Kóžda bywša princesna dósta šerpu z lětoličbu a bywši princ dósta norsku kapu.
Budyšin (kl/SN). Hłowna zhromadźizna župy „Jan Arnošt Smoler“ budźe 19. januara 2019 w Budyskim Serbskim domje. Župne předsydstwo je ju na swojim posedźenju srjedu w Budyšinje zwołało. Budźe to zdobom wólbna zhromadźizna. Štyri lěta po minjenych wólbach maja wobdźělnicy znowa županku abo župana wuwzolić a wo zestawje župneho předsydstwa rozsudźić.
Přihoty na zarjadowanje za staršich, dźědow, wowki a wšitkich zajimcow klětu w měrcu sej nětko hižo kedźbnosć žadaja. Župa planuje informaciski wječor wo dwurěčnym kubłanju dźěći wot pěstowarnje hač k šuli. Kak móhli za to wabić a staršich najlěpje zdobyć? W Malešanskej kónčinje su loni mysličku zrodźili, k tomu na wosebity staršiski wječor přeprosyć, wšako přećehnje w přichodnych lětach zakładna šula z Barta do Malešec. W susodstwje tamnišeje šule maja Witaj-pěstowarnju „K wódnemu mužej“. W přichodźe móhł to być bliski puć, dźěći w serbšćinje dale kubłać.
Informaciski wječork njebudźe jónkrótna naležnosć, dalše zarjadowanja maja w běhu lěta slědować.
Dnja 6. decembra wotměja tradicionalne kónclětne župne zetkanje.
Wojerecy (SN). Domowina wočakuje, „zo krajej Sakska a Braniborska struktury za cyłotnu Łužicu wuwiwatej, kotrež so na dobro žiwjenja našich wnučkow wuskutkuja“. To podšmórny předsyda Dawid Statnik po posedźenju prezidija Domowiny wčera we Wojerecach.
Prezidij bě so z mjezyrozprawu komisije za rozrost, strukturnu změnu, dźěło z 25. oktobra zaběrał. Tam mjez druhim zwěsća, zo su aktiwity wudobywanja brunicy we łužiskim rewěrje serbski lud wosebje poćežowali, wone su so jara na serbske prócowanja nastupajo zachowanje swojeje kultury a identity wuskutkowali. Serbska rěč słuša k tomu, měni prezidij. Tohodla je wosebita kedźbnosć trěbna, dźe-li wo přichodne wuwiće w regionje. „To zapřijima spěchowanje kultury a identity serbskeje mjeńšiny we łužiskim rewěrje.“
Wona wuznawa so jara derje z narodnej drastu Delnich Serbow a hori so za jeje eksaktne woblěkanje. To wšak zawěsće nikoho njezadźiwa, wšako je Doris Heinzowa wukubłana šwalča. 1946 rodźena Žylowčanka je jedna z tych mało ludźi, kotřiž delnjoserbšćinu jako maćernu rěč wobknježa. Minjeny měsac bě ju Domowina za čestnohamtske skutkowanje předewšěm nastupajo wědu wo narodnej drasće Delnich Serbow z Čestnym znamješkom počesćiła.
Hory (mka/SN). Mjeztym hižo 38. běrnjacy bal su minjenu sobotu na Horach pola Wojerec woswjećili. Tójšto hosći ze wsy a wokoliny bě přišło, zo bychu zabawny wječor ze serbskej a słowjanskej dujerskej hudźbu kapały Horjany dožiwili. Po tym zo běchu w minjenymaj lětomaj přihoty na serbski kwas a kwas samy předstajili, běchu křćizna tema lětušeho běrnjaceho bala.
Nimo turbulentnych podawkow, ke kotrymž móže na křćiznach dóńć, sposrědkowachu wopytowarjam wjele zajimaweho kołowokoło tohole swjedźenja, kiž słuša w žiwjenju kóždeje swójby sobu k najwažnišim podawkam. Hosćom předstajichu wotběh wosebiteho dnja w małych zahratych scenach. Nimo kmótow a kmótrow přińdźe pisana bobrija hosći do swjedźenskeho domu. Mjez nimi bě samo potomnik něhdy do Ameriki wupućowanych Serbow. Na Horach bydlacy lutki tohorunja njeskomdźichu, zo bychu wukřćenemu dźěsću gratulowali. To činjachu woni na jara žortne wašnje z dwójnej negaciju, kaž je to wot lutkow powšitkownje znate.