ST Ćisk –

ST 1922 Radwor 0:3 (0:2)

Zestawa hosći: Šěrak – B. Grubert, M. Dźisławk (80. Dej), M. Grubert, J. Bischof (82. Freudrich), J. Wjacławk (85. J. Pěčak), N. Šnajder, K. Hetaš, M. Adam, C. Dźisławk (74. Paška), J. Wróbl

Ze sylnje deciměrowanym mustwom dyrbjachu Radworčenjo w Ćisku nastupić.

Hra bě spočatnje bjezdwěla wurunana a wobaj kontrahentaj přińdźeštaj k šansam, kotrež móžachu hosćo derje wotwobarać. Wrotar Christoph Šěrak dźeržeše swoje wrota čiste. Radwor wobchadźeše tón dźeń lěpje ze swojimi šansami a móžeše hižo zahe nawjedować. Z pasom, kotryž bě z křidła přišoł, steješe Jakub Wróbl sam před wrotami a trjechi w 24. min. nawjedowanje 1:0. Krótko na to staji Niklas Šnajder wuslědk na 2:0. Po bojowniskim połčasu dźěchu hosćo skónčnje raz z nawjedowanjom do kabiny.

Po přestawce dóstachu hosćićeljo hižo w 51. min. čerwjenu kartku. Hewak by w tutej situaciji Caspar­ Dźisławk sam před wrota přišoł. Najebać hraća z mužom mjenje wojowachu Ćiskowčenjo dale. Ale wšo to bjez wuspěcha. W 79. min. pak spjelni Marvin Paška wšitke nadźije a trjechi ke kónčnemu stawej 3:0. Po tym móžeše Radwor wuslědk dźeržeć a docpě tak dalše wažne dobyće.

ST Marijina hwězda –

SJ Wjelećin 3:2 (3:1)

Zestawa domjacych: Schneider – Hoge, T. Jurš, K. Pakoßnick, Ladewig (70. F. Bulank), Wróbl, R. Cyž, Eldor, Peschmann (86. Clausen), Langer, Kreuz (90. D. Jurš)

Minjenu njedźelu přijachu koparjo Marijineje hwězdy na twjerdym hrajnišću direktneho tabulkoweho susoda z Wjelećina a móžachu ze sylnym bojom domjacu partiju za sebje rozsudźić.

Połnje dypkowali su njedźelu popołdnju we wokrjesnej wyšej lize koparjo prěnjeho mustwa SJ Chrósćicy. Woni dobychu 4:1 (2:0) přećiwo zeleno-běłym z Bukec. Hišće do połčasa bě Gabriel Zahrodnik dwójce trjechił. Dalše wrota za SJC dźěchu w druhim połčasu na wrotowej konće Bosćija Cyža a Marlona Wencela. Rjany wuspěch, kotryž bě zdobom prěnje dobyće po wosom poražkach a dwěmaj njerozsudnymaj hromaj, swjećachu koparjo rezerwy SJ Chrósćicy w předehrě. Mužojo wokoło kapitana Pascala Budarja dobychu 2:0 (1:0) přećiwo Arnsdorfskemu KT. Třělcaj wrotow SJC II běštaj Bosćan Donat a Křesćan Zahrodnik. Foto: Jörg Stephan

Wolejbulowe mustwo Sokoła Budyšin je žiwe! Ćežke časy, w kotrychž su wo tym přemyslowali, towarstwo rozpušćić a wolejbulowe mustwo wotzjewić, su najprjedy přewinjene. Na treningu wobdźěla so zaso prawidłownje dźesać do třinaće hrajerjow. Dalši wažny fakt: Sokoł Budyšin wostanje serbski! Nowačkojo su młodźi Serbja abo sympatizanća. Wšitcy su so zažiwili, woni treningowe wobsahi wobohaćeja a staraja so tež wo zhromadnosć zwonka sportoweje hale. Harmonija mjez hrajerjemi „wěčneje młodźiny Budyšin“ a „noweje Sokołmłodźiny“ wjedźe tež k tomu, zo su dypkowe hry zaso nahladne. Bohu dźakowni su wšitcy přez nawrót sobustawa z najdlěšej přisłušnosću Sokołej Budyšin. Po přewinjenju ćežkeje chorosće chce Jan Kanngießer dale kruty wobstatk mustwa resp. přistajer wostać. A hdyž nawróća so zranjeni top-hrajerjo, potom so zawěsće tež zaso dypkowe hry dobudu.