Na zwučene wašnje nastaji so jutrow­ničku dźewjeć serbskich křižerskich procesionow na puć do susodneje wosady, zo by poselstwo wo Zrowastanjenym wozjewiło. Runje tak je z wašnjom, zo podawamy do toho přehlad wo zajimawosćach procesionow. Te su nam jich kantorojo a nawodźa sposrědkowali. ­Dalokož su nam znate, wozjewjamy tež mjena jubilarow a nowačkow.

Po wšěm zdaću wšo při starym wostanje w Radworskim křižerskim procesionje. Kaž nam jeho zamołwity Marko Šuster zdźěli, změja lětsa šěsć nowačkow. Su to Kilian Henich, Titus Wićaz, Lukaš Hančik, Roman Hančik, Maximilian Krawža a Mato Wawrik. Daniel Henich a Michał Rječka pojěchataj jako slěbornaj jubilaraj. Radworski procesion je lětsa dobry přikład za to, kak so tradicija křižerstwa w swójbach dale dawa a kak wjacore generacije sobu jěchaja. Tak wuhladamy w rjadach křižerjow bratrow Marka a Jana Hančika. Dale pojěchataj jeju synaj Cyril a Mario sobu a lětsa prěni raz wnučkaj Lukaš a Roman.