Budyšin (SN/bn). „3 000 přihladowarjow, něhdźe 700 sobuskutkowacych, 28 předstajenjow, 10 hrajnišćow, pjedź hodźin nonstop – to tu wšědnje njedožiwjamy“, zjima Madleńka Šołćic z hosćićelskeho Němsko-Serbskeho ludoweho dźiwadła wčerawši 23. swětowy dźeń šulerskeho dźiwadła w Budyšinje. Předewšěm dźakowaše so „staršim, wučerjam a kubłarjam, kotřiž dźěći pohnuwaja hrać, spěwać, rejować a filmować. Tak spěchuja talenty, kotrež dźeń połny energije a temperamenta, kajkiž smy dźensa dožiwili, hakle zmóžnjeja“. Nimo toho dźakowaše so dźiwadłowej pedagogowce Véronique Weber-Karpinskej, kotraž je zarjadowanje „runja žonlerce hłownje organizowała a koordinowała“. Nimo wšitkich jewišćow a baletownje NSLDź wotměchu so předstajenja na žurli Serbskeho ludoweho ansambla, w awlomaj Powołanskošulskeho centruma Budyšin (BSZ) a Serbskeje wyšeje šule Budyšin kaž tež w Budyskim socio-dźiwadłowym centrumje Thespis.