Projekt „Wuměłstwowy bus“ spřistupnja mjeztym dźesać lět kulturu jěducy po Hornjej Łužicy. Lětsa wopřijima čara prěni raz stacije na sewjeru regiona; serbski podźěl programa je porno minjenym lětam jasnje rozrostł.

Zhorjelc (SN/bn). Dohromady tři linije pojědu lětsa w hodźinskim rytmusu po třiróžku Slepo – Mužakow – Běła Woda. Přidatnje poskićuja tak mjenowany shuttle z Budyšina přez Wulku Dubrawu, Delni Wujězd a Hamor do Běłeje Wody.

Na zwučene wašnje prezentuje cyłkownje wosom wuměłcow resp. cyłkow swoje programy w jězdźidłach. Mjez druhim chce Duwo Hejduška sep serbskich, němskich a jendźelskich spěwow w šaće rocka, popa a jazza předstajić, duwo Konjen melanžu stilow tango, bossa nova a jazz zahrać a z bywšich čłonow Křižneho chóra zestajany wokalny ansambl VIP sadźby hitow zabawneje hudźby a cappella zaspěwać. Nimo toho wustupuja wospjet wjacori šulerjo Budyskeje wokrjesneje hudźbneje šule.