150. jubilej schadźowanki w Budyskej Krónje hódnje woswjećili

Budyšin (SN/VaŽ). Kajki běše to wulkotny a pisany jubilej! Minjenu sobotu swjećachu 150. jubilej schadźowanki w Budyskej Krónje swjatočnje. Něhdźe 550 hosći so tam zeńdźe, zo bychu jubilej z wotměnjawym programom a swjatočnej naladu dožiwili. Wšelakorosć moderatorow, a z tym wobdźělenje wjacorych jubilejnych rjadownjow, kotrež wječor wobohaćichu, běše wosebita. Započałoj staj moderatoraj Wendelin Brězan a Tadej Šiman, kotrajž běštaj před dokładnje 50 lětami – 1974 – na Serbskim gymnaziju w Budyšinje maturowałoj. Ze šarmom a humorom zawjedźeštaj publikum do swjatočnosće.