Budyšin (SN/bn). Knižna premjera noweje zběrki basnjow a lyriskeje prozy Benedikta Dyrlicha „Serpowe dny – Sicheltage“ je wčera něhdźe 40 zajimcow do Smolerjec kniharnje přiwabiła. Antologija je takrjec z naslědnikom knihi „Der Tiger im Pyjama – Tiger w nócnej košli“ a wopřijima po słowach awtora teksty, kotrychž wobrazowa rěč wědomje krajiny kaž tež městnosće wotbłyšćuje, z kotrymiž je hłuboko zwjazany, mjenujcy wolenu domiznu Drježdźany, serbsku Hornju Łužicu a starosłowjansku połobsku kónčinu wokoło Mišna podłu Freibergskeje Modłeje. Na rěči swojeho tworjenja skedźbniwši podšmórny Dyrlich, zo swoju lyriku njepřełožuje, ale ju stajnje znowa komponuje. Přebasnjenje ze serbšćiny do němčiny a nawopak je „wjele, wjele dźěła“, kajkež sej tež hladajo na často čestnohamtsce skutkowacych awtorow, bjez kotrychž serbska literatura mjezynarodny niwow docpěła njeby, „wjace připóznaća zasłuža“.