Łaz (AK/SN). Zaměrowy zwjazk Łužiska jězorina chce klětu 1,8 milionow eurow inwestować. Swójski podźěl wučinja 340 000 eurow. Tole zdźěli jednaćel Daniel Jung na hłownej zhromadźinje zwjazka wutoru we Łazu, hdźež su radźićeljo etatowe wustawki a hospodarski plan za lěto 2017 schwa­lili.

Tak chcedźa za přebywanišćo turistow na južnym pobrjohu Lejnjanskeho jězora w prěnim wotrězku 485 000 a w druhim wotrězku hišće raz 144 000 eurow nałožić. Nastać maja multifunkcionalne twarjenje, maritimne připrawy, nimo toho městna za campingowe mobile a stany. Tež mosćik za čołmy chcedźa natwarić. Wotpowědne plany inženjerski běrow Sweco z Rěčic bórze předstaji.

Informaciski system za motorizowanych wopytowarjow ma 233 000 eurow płaćić, kaž hospodarski plan předwidźi. W tym zwisku chcedźa na wažnych dróhach a křižowanišćach informaciske tafle nastajić, zo móhli so turisća lěpje orientować. Potrjechene komuny budu při wothłosowanju nastupajo teksty na infotaflach zapřijate.