Łaz (AK/SN). Plan nowowužiwanja Hórnikečanskeho jězora po zakónčenju hórniskotechniskeho saněrowanja hač do lěta 2021 ma mjez zamołwitymi institucijemi Sakskeje nětko wyšu prioritu. Tole zdźěli Łazowski wjesnjanosta Thomas Leberecht (CDU). Dotal měješe plan na lisćinje spěchujomnych předewzaćow Sakskeje krajneje direkcije za lěto 2017 jenož „srjedźnu wažnosć“.

„Zwoprawdźenje plana bě wohrožene“, rjekny wjesnjanosta na minjenym posedźenju gmejnskeje rady. Z teje přičiny skontaktowa so wón ze zapósłancom CDU w Sakskim krajnym sejmje Frankom Hirchu. Tón móžeše krótkodobny termin z dr. Michaelom Wilhelmom, statnym sekretarom w sakskim nutřkownym ministerstwje, organizować. Wuslědk: Interministerielna skupina přiwozmje plan k ponowjenju Hórnikečanskeho jězora najebać „srjedźnu wažnosć“ do spěchowanskeje lisćiny za lěto 2017. „Nětko móžemy pola krajneje direkcije jednanje k přizwolenju plana zahajić“, Leberecht podšmórny.