Mjeńšinowy sekretariat žněje připóznaće na runinje Zwjazka

Berlin (SN/MiR). Zastupjerjo narodnych mjeńšin a ludowych skupin w Němskej dóstachu definitiwne připrajenje, zo móža nalěto 2017 w plenumje zwjazkoweho sejma přewjesć diskusiju wo regionalnych mjeńšinowych rěčach. Zdobom ma so tam direktnje wothłosować wo prašenjach mjeńšinowych rěčow. „Jeli tole woprawdźe docpějemy, smy zaměr dźěła za tule legislaturnu periodu zwjazkoweho sejma spjelnili, zo so mjeńšiny a ludowe skupiny w najwyšim politiskim gremiju Němskeje słyša“, rozłožuje nawodnica Berlinskeho sekretariata štyrjoch awtochtonych narodnych mjeńšin Němskeje Judith Wałdźic. Najbytostniše posedźenje w tejle naležnosći běše schadźowanje mjeńšinoweje rady spočatk decembra w Berlinje.