Erika Zuchold słušeše k najelegantnišim ćěłozwučowarkam swěta
Erika Zuchold narodźi so 19. měrca 1947 w durinskej wjesce Lucka we wokrjesu Altenberg jako Erika Barth. Poprawom chcyše wona přeco do cirkusa. Prjedy hač pak swój cil docpě, wopokaza so jako přewšo elegantna ćěłozwučowarka.
Znata po cyłym swěće bu wona hižo jako 17lětna 1964 we wobłuku mišterstwow Němskeje demokratiskeje republiki (NDR) w Halle, hdźež jako prěnja ćěłozwučowarka swěta swój flikflak na hrjedźe (Schwebebalken) pokaza. Z tutym wukonom je wona ćěłozwučowanje rewolucionowała. A tak by tež na Olympiskich lětnich hrach w japanskej stolicy Tokio swoje konkurentki překwapić móhła. Wotpowědne wurisanja za cyłoněmske mustwo je sportowča SC Lipska z wulkim wotstawkom dobyła, a to hišće jako rodźena Barth. Tehdy sym ju tež jako tajku zeznał. Wona wšak běše tež čłonka sportoweho kluba SC Lipsk, sekcije ćěłozwučowanja. Ja pak trenowach a so wubědźowach stajnje kónc tydźenja a w prózdninach jako běhar a čłon tutoho kluba hač do lěta 1965.