Módro-běli Kulow
– SJ Njebjelčicy 7:0 (3:0)
Za domjacych hrali: P. Korch – Sauer, Hantschke, B. Korch, Wehlan, A. Korch, Brückner, Böttger, Nicolaides, Bergmann, Zabłocki, Peschel, Kocor, Koplanski, Popjela, Lohan, Lange, Piatza
za hosći zasadźeni: Hahn, D. Ričel – Kral, Hanuza, Haška, Korjeńk, F. Ričel, Šołta, Wagner, Pawlik, Zeller, Hjehor, O. Domš, Čornak, Plaettner.
Chowancy trenarskeje dwójki Handrij Krawčik/Daniel Ričel běchu so k swojej třećej přihotowanskej hrě do Kulowa k tamnišemu wokrjesnemu wyšemu ligistej podali. Zo budźe tam ćežko derje wobstać móc, běše zwoprědka wšěm aktiwnym jasne. Wšako znowa šěsć Njebjelčanskich hrajerjow pódla njebě. Nimo toho hraja Módro-běli klasu wyše. Zo pak sami žane wrota njetřěla a na tamnej stronje hnydom sydom napraskanych dóstanu, njeběchu hosćo wočakowali.