Minjenu sobotu přewjedźechu we Worklecach tradicionalny captainscup, – bičwolejbulowy turněr za dwójki, kotryž organizuje Sportowe towarstwo Viktoria Worklecy. Po tym zo nastupichu sobotu mustwa z dwěmaj hrajerjomaj, wotmě so dźeń pozdźišo měšany turněr. W kóždym cyłku nastupichu přeco dwě žonje a dwaj mužej. Přidatne miksowe wubědźowanje su lětsa do žiwjenja zwołali, po tym zo běchu do toho přeco jenož dwójki hrali.
Cyłkownje wubědźowaše so njedźelu šěsnaće mustwow w štyrjoch staflach. Wjedro běše nimale přez cyłe předkoło chětro špatne, štož pak sportowče a sportowcow wulce njemyleše. Organizatorojo běchu wjacore stany nastajili, hudźba bě słyšeć a ćělne derjeměće běše tohorunja zaručene. Tak hodźeše so dešć wudźeržeć, a wšitcy běchu přiwšěm dobreje nalady.