Wustawoškit Sakskeje widźi „korjenje w nacionalsocializmje“

Drježdźany (SN/mb). Neonacistiska strona „Swobodni Saksojo“, kotraž we wokrjesomaj Budyšinje a Zhorjelcu w „Zwjazku Hornja Łužica“ k wólbam wokrjesneho sejmika nastupi, ma w Sakskej mjeztym nimale telko čłonow (1 200) kaž AfD (1 300). Najnowša rozprawa sakskeho wustawoškita, kotruž staj nutřkowny minister Armin Schuster (CDU) a prezident zarjada Dirk-Martin Christian wčera předstajiłoj, liči za loni 2 566 deliktow z ekstremistiskim prawicarskim pozadkom (2022: 1 709). Z toho bě so 222 direktnje na politisce hinak myslacych měriło (2022: 97), 712 je policija jako delikty „přećiwo cuzym“ pohódnoćiła (2022: 394).