ST Hnašecy/Dobruša –

SJ Chrósćicy 3:3 (1:1)

Zestawa hosći: Ki. Mark (67. Škoda) – Rätze (56. Kl. Mark), B. Cyž, Zynda, L. Zahrodnik, Wencel (84. Donat), Hawš, M. Zahrodnik, Graf, G. Zahrodnik (70. Młynk), Bogusz

Na poslednim hrajnym dnju prěnjeje połserije dojědźechu sej Chróšćenjo do Dobruše. Tamniše sportowe towarstwo steji na třećim městnje tabulki. Chróšćenjo pak chcychu na kóncu lěta na kóždy pad hišće raz dypkować a swoju wonkownu bilancu polěpšić.

Start hry słušeše domjacym. Na dobrym kumštnym trawniku pokazachu swoje lěpšiny a sej hnydom dobre móžnosće nadźěłachu. Zastupowacy wrotar Kito Mark měješe hnydom něšto za dźěło. We 8 min. dóstachu Hnašečenjo po foulu w šěsnatce pokutny kop, kotryž Martin Bartke k 1:0 přetwori. Tež po tym domjacy hru dale postajowachu. Dalše móžnosće pak njewužiwachu. Po poł hodźinje so tež Chróšćenjo raz před wrotami jewichu. Prěnje móžnosće pak njeběchu hišće wuspěšne. Krótko do połčasa pak docpěchu skónčnje wurunanje. Jan Bogusz wuži zmylk škitarja při srjedźnej liniji a měrješe so sam na wrota. Tam wosta měrny a třěli bul w 35. min. k 1:1 do wrotow.