Banka ma płaćić
Wnuk Stalina zemrěł
Moskwa (dpa/SN). Politisce aktiwny wnuk něhdyšeho sowjetskeho diktatora Józefa Stalina je njeboh. Jewgenij Dźugašwili je 80lětny w Moskwje zemrěł. Tole rozprawja powěsćernja Tass, powołujo so na informacije lěkarjow. Syn najstaršeho dźěsća Stalina Jakowa bě stajnje zaso podarmo před sudnistwami přećiwo pozdatnemu wočornjenju swojeho dźěda skoržił. Naposledk je něhdyši oficěr na wuměnku w oktobrje před sudnistwom zwrěšćił. Tam bě wón přećiwo nowej stawizniskej wučbnicy skoržił. W njej wšak korektnje na to pokazuja, zo běchu na přikaz sowjetskeho centralneho komiteja, potajkim tehdyšeho wyšeho rozkazowarja Józefa Stalina, dźesaćitysacy pólskich oficěrow w Katynskich lěsach 1940 morili. Stalin (1878–1953) rěkaše poprawom Dźugašwili. Wón pochadźa z georgiskeho města Gori. Jeho wnuk bě ruski a georgiski staćan a bydleše w Moskwje a Tbilissiju.
Stalin bě w Sowjetskim zwjazku mjez druhim wina na masowych deportacijach a na morjenju milionow ludźi.
To a tamne (23.12.16)
Tójšto zboža měješe wopity muž w Nürnbergu, jako jeho železnica přejědźe. 21lětny ležeše po informacijach policije „chětro za alkoholom wonjacy“ na kolijach Nürnbergskeho dwórnišća. Lokomotiwnik přijěduceho spěšnoćaha njemóžeše hižo w prawym času zaborzdźić a přejědźe muža, kiž po dołhosći wosrjedź kolijow ležeše. Njezranjeneho dowjeze wuchowanska słužba natutkaneho muža do chorownje. Jeho drje nětko strašneho zapřimnjenja do železniskeho wobchada dla wobskorža.
Nowe rekordy drje lětsa zaso na Drježdźanskich dohodownych wikach nastaja. Město trochuje, zo budźe to 2,5 milionow wopytowarjow, kaž dźensa rěkaše. Loni bě jich 2,2 milionaj. Tež horce wino tam derje předawaja: Dotal bě to 730 000 hornčkow, 120 000 wjace hač před lětom. Hač do jutřišeho w 14 hodź. su dohodowne wiki hišće přistupne.
Ministerka pola wojakow
Masar-i-Sharif (dpa/K/SN). Ministerka za zakitowanje Ursula von der Leyen (CDU) přebywa dźensa w Afghanistanje. W pólnym lěhwje Zwjazkoweje wobory Masar-i-Sharif sposrědkowa wona tam zaměstnjenym něhdźe 200 němskim wojakam wosobinsce tradicionalny hodowny postrow. Wěstotne połoženje w Afghanistanje je so lětsa chětro pohubjeńšiło. Hakle w nowembru běchu talibanojo němski generalny konsulat w Masar-i-Sharifje nadpadnyli a šěsć ludźi morili.
Přećiwo wójnskim złóstnikam
New York (dpa/SN). Wójnscy złóstnicy dyrbja přichodnje z tym ličić, zo jich njeskutkow w Syriskej dla zasudźa. Hłowna zhromadźizna UNO je wčera wotpowědnu rezoluciju wobzamknyła. Wona předwidźi, zo smě UNO informacije wo móžnych złóstnistwach zběrać a je pozdźišo sudnistwu přepodać. Zrěčenje we hłownym plenumje bě na wčerawšim schadźowanju 105 z cyłkownje 193 čłonskich statow podpěrało. Němska je rezoluciji přihłosowała. Přećiwo njej hłosowachu mjez druhim Ruska, Iran a China.
Miliardar jako poradźowar
Dohodowne wiki na Berlinskim Breitscheidowym naměsće, hdźež bě ...
Pytaja Amrija po cyłej Europje
Prezident Putin so wobdźělił
Šef Bombardier přeprošeny
Tradicionalne kemše ze swěcu měra
To a tamne (22.12.16)
Pašowaneje kóčki dla su žonu z Kanady na lětanišću w Nowoseelandskej wupokazali. Žona bě z Vancouvera přilećawši w Aucklandźe přizemiła. Zastojnikam zarjada za biowěstotu wona zataji, zo ma kóčku w ručnej tobole. To so hakle wukopa, jako chcychu cłownicy tobołu přepytować. Runu smuhu sadźichu žonu do přichodneho lětadła do Kanady. Nowoseelandska ma krute prawidła w zwisku ze zwěrjatami. Psy a kóčki njesmědźa do kraja, zo by so tam chorosćam zadźěwało.
Inscenowany rubježny nadpad za widejo budźe za fanow rapa w Kasselu droha wěc. Swědk bě policiju wołał, po tym zo bě nadpad na kiosk wobkedźbował. Zastojnicy přijědźechu z wjacorymi awtami. Wobsedźer kioska rozprawješe wo přećelach, kotřiž běchu jenož film natočili. Přiwšěm čaka na nich zličbowanka něšto stow eurow policajskeho zasadźenja dla.
