Obama připowědźa wjećbu
Washington (dpa/SN). Po pozdatnych nadpadach ruskich hackerow za čas wólbneho boja w USA je prezident Barack Obama tak raznje kaž hišće nihdy wjećbu připowědźił. „Hdyž wukrajne knježerstwo spyta, wólbny bój manipulować, dyrbja USA jednać“, rjekny Obama sćelakej National Public Radio. „Tole činimy, hdyž mamy to za trěbne.“ We wólbnym boju buchu interne mejlki demokratiskeje kandidatki Hillary Clinton znate. Tole je jej chětro zeškodźało. Pječa su ruscy hackerojo za to zamołwići.
Wo ćěkancach debatowali
Berlin (dpa/SN). Zwjazkowy sejm je po wčerawšim wotsunjenju afghaniskich požadarjow azyla do jich domizny wo škiće tutych ćěkancow debatował. Zeleni a Lěwica žadachu sej, žane dalše wotsunjenja do Afghanistana njedopušćić, dokelž njeje tam wěstota ludźi zaručena. Wčera bě lětadło ze 34 wotpokazanymi požadarjemi azyla w afghaniskej stolicy Kabulu přizemiło. W dźělach kraja howrja wojowanja mjez talibanami a jednotkami knježerstwa. Zwjazkowe knježerstwo pak ma někotre kónčiny kraja za dosć wěste.
Japanska a Ruska zhromadnje
Florian Pichlmeier (nalěwo) und Hans Hanus z Ingolstadtskeho ...
Wotwožowanje ludźi traje dale
Kanclerka winuje Rusku złóstnistwa
Wobydlerjo 28 wsow přećiwo nowym jamam
Podstupim (SN). Wobydlerjo 28 na brunicowych składźišćach stejacych wsow Braniborskeje žadaja sej, w nowym krajnym wuwićowym planje nowe brunicowe jamy zakazać. Wotpowědne stejišćo su zastupnicy Choćebuskeje wobswětoškitneje skupiny zamołwitym za planowanje w Podstupimje přepodali, piše Zelena liga w medijowej zdźělence. Samsny čas je so doba skónčiła, w kotrejž mějachu potrjecheni přiležnosć, swoje wobmyslenja a pokiwy k Berlinsko-braniborskemu wuwićowemu planej zapodać. „Hórniske předewzaća sej brunicowe jamy kaž Janšojce-sewjer, Bageńc-wuchod abo Grodk-wuchod na kóšty wobydlerjow jako rezerwu dźerža. Wobydlerjo pak maja prawo na planowansku wěstotu“, rjekny René Schuster z Choćebuskeje wobswětoškitneje skupiny. W tym zwisku pokaza wón na Baršćansku měšćansku zhromadźiznu, kotraž bě minjeny tydźeń žadanjam Zeleneje ligi wotpowědowała a nowe brunicowe jamy wotpokazała. „Krajne knježerstwo dyrbi nětko skónčnje reagować“, tak Schuster.
Wo mjeńšinach so wobhonił
To a tamne (16.12.16)
Wustawowe sudnistwo Čěskeje republiki je žadanje wobydlerja wotpokazało, swójske „wosobinske identifikaciske čisło“ změnić. Požadar ma dźě w dokumentach muski splah zapisany, po swójskim wuprajenju čuje pak so jako žona. Dokelž móžeš z čěskeho identifikaciskeho čisła splah wučitać, čuje so skóržbnik z přirjadowanjom k mužam „trawmatizowany“.
Dźakowano swojemu dobremu čuchej staj policistaj plantažu konopja namakałoj. W vogtlandskim Muldenhammeru jimaj wčera spodźiwna wóń napadny. Slědujo podhladnu wóń dóńdźeštaj ke kólni. Při přepytowanju tepjeneho twarjenja nańdźeštaj wjace hač 50 rostlin konopja (Canabis). Kólnja steji na ležownosći 39lětneho muža. Tón dyrbi so nětko ilegalneho plahowanja wopojnych srědkow dla zamołwić. Poprawom běštaj policistaj padustwa dla po puću.
Změny w přichodnych lětach njewobeńdźomne
Chrósćicy (aha/SN). Změny w serbskej katolskej kónčinje njebudu w přichodnych 15 lětach wobeńdźomne. Tole je facit wčerawšeho wopyta Drježdźansko-Mišnjanskeho biskopa Heinricha Timmereversa w serbskich wosadach. Nimo zetkanja ze serbskimi duchownymi w Radworju rozjimowaše wón w Njebjelčicach ze zastupjerjemi serbskeho pastoralneho ruma trěbne přichodne kročele. Połny zaćišćow bě biskop wo zetkanjach a rozmołwach, předewšem wo skutkownym dźěle z młodźinu a dźěćimi.
Z koncernami so dojednać
Berlin (dpa/SN). Němske knježerstwo smě z energijowymi koncernami dojednanje wo wotstronjenju jadrowych wotpadkow wotzamknyć. Zwjazkowy sejm je dźensa wot unije, SPD a Zelenych zhromadnje předpołoženy naćisk zakonja schwalił. Po nim maja koncerny EON, Vattenfall, RWE a EnBw hač do lěta 2022 něhdźe 23,5 miliardow eurow do wosebiteho statneho fondsa płaćić, kotryž kónčne składowanje radioaktiwneho materiala rjaduje. Składźišćo njejsu hišće našli.
Seehofer staja wuměnjenja
Mnichow (dpa/SN). Předsyda CSU Horst Seehofer wobstawa dale na kruće postajenej hornjej mjezy 200 000 ćěkancow, kotřiž směli wob lěto do Němskeje přińć. Tole je wažne wuměnjenje dalšeho wobdźělenja CSU na nowym zwjazkowym knježerstwje po wólbach 2017, rjekny Seehofer powěsćerni dpa. „Hewak póńdźe CSU do opozicije.“ Hornja mjeza je po jeho měnjenju trěbna, zo móhła so čłowjeskosć zachować, integracija zmištrować a wěstota wobydlerjow zaručić.
Pjenjezy EU afriskim krajam
