Měšane mustwo wolejbulistow z Pančic-Kukowa, Budyšina a Hnašec je pod chorhoju ST Marijineje hwězdy tydźenja w Rudnych horinach nastupiło. Tam chcychu sej we wobłuku němskeho mišterstwa w starobnej klasy sk 60 finalne městno wudobyć.

Kontrahentaj běštaj staraj znataj zašłych lět: VSV Fortuna Göltzschtal a SZ Motor Thurm. Bilanca dotalnych hrow w běhu lět wšak běše wurunana, dominantne žane z mustwow njebě. Nimo kwalifikacije wuhra so w turněrje tež sakski mištr tuteje starobneje klasy. Łužičenjo wšak mějachu po lońšim dobyću titul zakitować.

W prěnjej hrě dnja nastupichu wolejbulisća z Thurma a z Göltzschtala. Po spočatnje jasnym nawjedowanju Thurmowčanow doby Göltzschtal prěnju sadźbu z 34:32. To lubješe napjaty dalši bój. Po dołhim tam a sem na spočatku hry přesadźi so w druhej sadźbje Motor Thurm z 25:22. A tiebreak rozsudźi na kóncu tola jasnišo Motor Thurm z 15:10 a z tym hru 2:1 za sebje.