17. wulkeho róžka před sto lětami zemrě w Budyšinje farar a senior tachantstwa Jakub Skala. Wón bě tež nachwilnje administrator nowozałoženeho Mišnjanskeho biskopstwa. Swój posledni wotpočink namaka při zapadnej nutřkownej muri rozwalinow Mikławškoweje cyrkwje pódla rowa Michała Hórnika. Wo jeho wulki narowny pomnik bě so Skala postarał a jón zapłaćił. Swójski narowny pomnik je jednoriši, z pěskowca. Na nim steji tekst we łaćonskej rěči z jeho žiwjenskimi datami a titlemi. Jakub Skala narodźi so jako syn chěžkarja a krawca 18. małeho róžka 1851 w Chrósćicach. Wón bě chowanc Praskeho Serbskeho seminara a sobustaw towarstwa Serbowka. Tehdy je basnje, krótkoprozu a ludowědne přinoški do „Kwětkow“, rukopisneho časopisa serbskich seminaristow, zapodał. Po studiju teologije w Praze bě wot 1876 do 1881 kapłan w Radworju. Dźesać lět bě kapłan w Budy­šinje, wot lěta 1891 do 1898 farar, potom šolastik a wot 1905 hač do smjerće senior tachantstwa. Swojeho sylneho angažementa za serbstwo dla wotpokaza cyrkwinska wyšnosć jeho kandidaturu za biskopa, kotruž Serbja wočakowachu.