10. wulkeho róžka před 25 lětami bu na Budyskim Michałskim pohrjebnišću druhi serbski superintendent a wjelelětny farar Njeswačanskeje wosady Gerhard Wirth pochowany. Na sto přewodźerjow bě na jeho pohrjeb přišło. Gerhard Wirth narodźi so 26. junija 1911 w Stróži pola Rakec do narodnje wědomeje burskeje swójby. Jeho bratr Pawoł bě rěčespytnik a załožer serbskeje rěčneje geografije. Młody Gerhard jězdźeše wšědnje z Kurtom Pětřom, pozdźišim profesorom a direktorom Serbskeho wučerskeho wustawa, ze železnicu z Rakec do Budyšina na gymnazij. Po maturiće studowaše wón teologiju a bě pozdźišo z fararjom w Budyšinku. Jako Serb a přisłušnik Wuznawanskeje cyrkwje je so do Šleskeje přesydlił, ale bórze dyrbješe do wójska. 1939 woženi so z burskej dźowku Hilžbjetu Křižanec. Po nawróće z wójnskeje jatby fararješe najprjedy w Budyšinje, a wot lěta 1947 do 1976 bě z wob­lubowanym fararjom w Njeswačidle. Tam dyrbješe so najprjedy sobu wo nowona­twar we wójnje zničeneje cyrkwje starać a bě něšto lět z čłonom zwjazkoweho předsydstwa Domowiny a zamołwity za zwiski z ewangelskimi Serbami.