Před někotrymi tydźenjemi pobychu zastupjerjo Němskeje koparskeje ligi DFL w Choćebuzu, zo bychu materielno-techniske wuměnjenja w LEAG Energijowym stadionje za pad postupa do druheje ligi pruwowali. Wuslědk posudźowanja bě poražacy. Tak wozjewi dospołnje přesłapjeny předsyda FC Energije Choćebuz Sebastian­ Lemke posudźowanje pruwowarjow DFL kónc februara: „Su nam jasnje wuwědomili, zo je naš stadion za druhu ligu njedosahacy, a zo njedóstanjemy licencu po našim ewentualnym postupje.“

Wopodstatnjeny tutón rozsud je, wšako žadaja w 2. lize mjez druhim sylnosć připrawow za swětło a za swětłomjetaki we wysokosći 1200 lux. Nimo to dyrbja wšitke městna za sedźenje bjezwuwzaćnje třěchu měć. Tež medijowy wobłuk dyrbjeli rozšěrić, wuměnjenja za wrotowu techniku zawěsćić a ławki za narunanskich hrajerjow jasnje rozšěrić. Wšitke tele žadanja njemóža so z financneho etata nowačka třećeje ligi zaručić. Tuž wobroćichu so zamołwići na město Choćebuz a kraj Braniborsku. Próstwy wo eksterne spěchowanje njewostachu bjez wuslědka.