Aktualna debata wo jadrowej milinje wotbłyšćuje wuběrnje tuchwilnu diskusijnu „kulturu“ w towaršnosći a je nimo toho z dosć „šwarnym“ přikładom za „realnu“ runje tak kaž za „symbolowu“ politiku. Za stajnym blidom – hač za woprawdźitym w korčmje abo za wirtuelnym w interneće – bě a wostanje wěcownosć častodosć rudimentarna. Tomu polěkuje, zo sej knjez Merz nětko žada, rozsud wotšaltowanja poslednich třoch atomowych milinarnjow cofnyć, byrnjež tule kročel tehdy knježaca CDU sobu wobzamknyła. Zo wotpowědni wobhospodarjo tajkele ideje wotpokazuja, po wšěm zdaću žanu rólu njehraje. A zwotkel trěbne nowe palne žerdki z urana abo plutoniuma brać? Snano maja někotři křesćanscy demokraća (a někotryžkuli stronjan FDP) plany w fašku, lětdźesatki dołho z miliardami (zjawnymi) eurami saněrowane podkopki w Rudnych horinach reaktiwizować, štož pak so nanajskeršo wot dźensa na jutře zwoprawdźić njehodźi.