„We wuskim kruhu swójby a přećelow“, ze šěsćdźesat ludźimi, woswjeći Marko Suchy njedźelu w Röhrscheidtowej bašće Serbskeho ludoweho ansambla swoje sydomdźesaćiny.

Suchy narodźi so 30. pražnika 1953 w Sulšecach. Dołho hižo w Sćijecach bydli. Hač do towaršnostneho přewróta dźěłaše diplomowy inženjer za elektrotechniku w awtomatizowanej tworni za ćěrjace kolesyny a běše zamołwity za wudźeržowanje techniskeje infrastruktury. Po krótkim času jako překupski šef bu 1992 jako direktor Załožby za serbski lud woleny. Tute zastojnstwo wón hač do 2015 wukonješe.