Třeći wólnočasny wolejbulowy turněr serije „top sydom“ w Ralbičanskej sportowni dobychu znowa sportowče a sportowcy ST 1922 Radwor před wučerjemi Serbskeho gymnazija Budyšin (SGB) a abiturientam lěta 1996.

Prěni raz wuhotowaše sekcija wolejbul DJK Sokoła Ralbicy/Hórki turněr serbskich wólnočasnych mustwow a zwyši tak seriju wurisanjow při wysokim saku na sydom. Třeća stacija w tutym lěće wotmě so minjenu póndźelu w sportowni Serbskeje wyšeje šule Ralbicy, hdźež powita hłowna organizatorka wječora Annett Kralowa dalšich šěsć cyłkow kaž tež domjace młodźinske mustwo Sokoła na tak mjenowany „Jutrowny turněr“.