Sokoł Ralbicy/Hórki – SJ Chrósćicy 1:1 (0:1)
Zestawa domjacych: Schöne – Šołta (60. Rawš), B. Heidorn, Wałda, Mjechela, Korjeńk, Šewc (75. Mikławšk), Gloxyn, L. Heidorn (62. Domaška), Hicka (77. Woko), Bejmak
Zestawa hosći: Škoda – Rätze, Zynda, F. Cyž, B. Cyž, G. Zahrodnik, M. Zahrodnik (90. B. Donat), Hawš, Handrik (70. L. Zahrodnik), Bogusz (70. Młynk), Graf (90. Wornar)
Před wosom lětami a třomi měsacami wojowachu Chróšćenjo a Ralbičenjo posledni raz na hrajnišću přećiwo sebi. Tehdy dobychu Sokoljo we Wulkej Dubrawje 4:0. Běše to wokrjesne pokalne finale. Po tutej hrě rozžohnowachu so Chróšćenjo wosom lět dołho do krajneje klasy. Po lětušim zestupje mustwa SJC je so njedźelu nětko zaso horco wočakowany derby w Ralbicach přewjedł. Špatneho wjedra dla – cyły dźeń so mócnje dešćowaše – pak přichwata jenož něhdźe 150 přihladowarjow do Stadiona „Jurij Frencl“.
