Pod tutym hesłom-nadpismom hrajachu srjedu tydźenja na Chróšćanskim sport­nišću kopańcu. Tam nastupi Chróšćanska młodźina A přećiwo cyłkej misionskeho dwora z Lěskeje (Lieske). Zamołwići w Lěskej poskićeja tamnišim wobydlerjam mjenujcy tež kopańcu. Štyrjo hladarjo přewjedu zhromadnje ze zbrašenymi ­jónu wob tydźeń koparski trening. Aktualnje přihotuja so na integratiwny ­turněr „Isar-Cup“, kotryž so spočatk julija w Mnichowje přewjedźe. Tam wubědźuja so měšane mustwa, kiž wobsteja z hra­jerjow z a bjez handicapa. Tuž bě testowa hra za inkluziske mustwo z Lěskeje dobra móžnosć swoje kmanosće na trawniku wuspytać.