Serbski běhar so na 36. nalětnim Haspa marathonowym wubědźowanju w Hamburgu sobu wubědźował
Swój prěni oficialny marathonowy běh je serbski běhar Jakub Čórlich z Němcow njedawno w Hamburgu we wobłuku mjeztym hižo 36. mjezynarodneho swětosławneho nalětnjeho wurisanja z brawuru zmištrował. Tele w Němskej najwjetše a kóždolětnje najzaše wubědźowanje w Hamburgu přiwabi stajnje tysacy lubowarjow tutych 42,192 kilometrow z tu- a wukraja.
Lětsa je 5096 běharjow a běharkow tutu distancu z brawuru zmištrowało. Cyłkownje je so na 25 000 starterow wuspěšnje w Hamburgu wubědźowało, mnozy w połmarathonje abo dalšich krótšich distancach. Aktiwni běchu z tójšto cuzych krajow, wosebje profijojo a wulka wjetšina pak lubowarjo běhanja z cyłeje Němskeje. Přewšo wjele zahoritych přihladowarjow při čarje marathona je běharjow a běharkow mócnje kleskajo, wołajo, trubjo, piskajo atd. pohonjało.
