29. běh na Sokolnik a po horje

znowa mnohich atletow přiwabil

Spočatk róžownika wotmě so po dwulětnej přestawce koronapandemije dla zaso jara naročny běh we Wjazońcy na horu Sokolnik, po njej a zaso wróćo. Tele napinace wubědźowanje je po tradiciji triatlonowe towarstwo Sokolnika organizowało. Jednotliwe distancy wurisanjow běchu 1 km, 2,5 km, 5,5 km a 12 km kaž tež tak mjenowany trail na 30 km, na kotrychž je cyłkownje 179 atletow cil docpěło. Dobra połojca lubowarjow běhanja startowaše na dlěšich čarach. Běharjo běchu z cyłeje Hornjeje kaž tež ze srjedźneje Łužicy, z Drježdźan, Pirny, Radeberga a z delnjołužiskeju Grabina (Finsterwalde) kaž tež Grodka. Mjez nimi je tež lětsa zaso horstka serbskich lubowarjow běhanja z brawuru wobstała.