Wo starych bohach
Moderator telewizijneho magacina Łužyca Christian Matthée wita přihladowarjow tónraz z haja słowjanskich bohow w Nowej Wsy pola Choćebuskeho wuchodneho jězora. Tam rozmołwja so z wjelelětnym kuratorom Choćebuskeho Serbskeho muzeja Wernerom Měškankom wo dźensa lědma hišće znatych nabožnych předstawach našich prjedownikow.
Dalšej programowej dypkaj wěnujetej so prašenju, kak lětsa w Delnjej Łužicy najebać koronu nałožk zapusta pěstuja, a situaciji wobydlerjow Trjebina hladajo na wotbagrowanje dźěla wsy. Nimo toho rozprawjeja telewiznicy wo wopomnjeću lětušich 100. posmjertnin wučerja, kantora a nowinarja Kita Šwjele.
Pod hesłom „In memoriam“ spominaja na serbskeju komponistow Jana Bulanka a njedawno zemrěteho Jura Mětška.
Telewizija RBB wusyła Łužycu jutře, 19. februara, w 13.30 hodź. Wospjetowanje na samsnym sćelaku slěduje srjedu, 23. februara, w 3.15 hodź. W mediatece RBB móžeće sej magacin wot jutřišeho cyłe lěto kóždy čas wobhladać.
Plany noweje jednaćelki
Ćežišćo februarskeho wudaća telewizijneho magacina Wuhladko je „generaciska změna“ na čole Domowiny. Nowa jednaćelka třěšneho zwjazka serbskich towarstwow Judit Šołćina powěda w interviewje wo swojich planach a předstawach do přichoda. Z dalšim přinoškom wěnuja so lětušemu 26. jolka-swjedźenjej w Nuknicy, kotryž bu znatych přičin dla wospjet ryzy digitalnje wuhotowany.
Składnostnje prapremjery noweje inscenacije Němsko-Serbskeho ludoweho dźiwadła „Šěrcec Hanka“ wuswětla Wuhladko pozadki titulneje rjekowki, kotrejž bě Jurij Koch z nowelu „Židowka Hana“ literarny pomnik stajił. Nimo toho přewodźeja telewiznicy wučerja na wuměnku Hansa-Jürgena Flaku, kiž w biosferowym rezerwaće Hornjołužiska hola a haty za dźiwami přirody slědźi.
Telewizija MDR wusyła Wuhladko jutře, sobotu, w 11.45 hodź. Wospjetowani slědujetej póndźelu, 7. februara, w 6.40 hodź. na samsnym sćelaku resp. sobotu, 12. februara, w 13.30 hodź. w telewiziji RBB. W mediatece ARD je magacin wot jutřišeho cyłe lěto kóždy čas přistupny.
Łužiscy centawrojo
Jubilej a digitalizacija
Ćežišćo přichodneho telewizijneho magacina Wuhladko je jubilej Serbskeho ludoweho ansambla. Jeničke profesionalne serbske ćěleso, předstajace hudźbu, reje a hudźbne dźiwadło, bu před 70 lětami załožene. Zdobom wěnuja so dosć ćežkej situaciji w SLA w minjenymaj lětomaj, w kotrymajž běchu pandemije dla něhdźe 150 planowanych zarjadowanjow kaž tež turneje, mjez druhim po Chinje, Španiskej a Ruskej, wupadnyli.
Pod hesłom „Quo vadis digitalne serbstwo“ zhladuje Wuhladko na spočatk decembra wotmětu druhu serbsku digitalnu konferencu a rozjimuje prašenje, hač drje je „dosć kmanych a kompetentnych ludźi“, kotřiž móža sep „idejow a inowatiwnych konceptow“ zwoprawdźić. Z dalšim přinoškom wuhódnoća lońšu „Hodownu akciju“. Publikum bě za nju dohromady 45 „hodownych drohoćinkow“ zapodał, a něhdźe 3 000 přihladowarjow je wo nich wothłosowało. Nimo toho portretuja w magacinje Budyske towarstwo Dźěłań dźeń a pokazaja, kak předsyda André Měrćink unikatne kickery zhotowja.
Adwent w Błótach
W decemberskim wudaću telewizijneho magacina Łužyca wita moderator Christian Matthée přihladowarjow z Błótow. Wón bě so na puć nastajił, zo by městnosć našoł, hdźež hodźitej so adwentna nalada a koronowe postajenja zjednoćić. W Bórkowach bě wuspěšny a poda so mjez druhim na jězbu z čołmikom po jónkrótnej wódnej kónčinje groblow. Wosebity hósć wusyłanja je Bernd Pittkunings. Serbski spěwacy poet chce přihladowarjam na swoje wašnje hodowne začuća wobradźić.
Telewizija RBB wusyła Łužycu jutře, 18. decembra, w 13.20 hodź. Wospjetowanje na samsnym sćelaku slěduje srjedu, 22. decembra, w 2.45 hodź. W mediatece RBB je magacin wot jutřišeho cyłe lěto kóždy čas přistupny.
Serbja a korona
Wo róli mjeńšin w zwjazkowej politice
Za přichodne wusyłanje telewizijneho magacina Łužyca je so moderator Christian Matthée do Berlina podał. W němskej stolicy wobhoni so wón wo tym, kotru rólu narodne mjeńšiny w zwjazkowej politice hraja. Pytajo za wotmołwami je so z tójšto wosobinami zjawneho žiwjenja rozmołwjał. Mjez druhim porěča z bywšej nawodnicu mjeńšinoweho sekretariata štyrjoch awtochtonych narodnych mjeńšin Němskeje Judit Šołćinej a jeje naslědnikom w zastojnstwje Göstu Nissenom. Nimo toho rozmołwješe so z nowej čłonku zwjazkoweho sejma Maju Wallstein (SPD, direktnje woleneje kandidatki wo-krjesa Choćebuz-Sprjewja-Nysa. Tež z jeničkim narodnej mjeńšinje přisłušacym sobustawom tele dny konstituowaceho so aktualneho parlamenta Stefanom Seidlerom (Južnoschleswigski wolerski zwjazk/SSW) je so Matthée zetkał.
Telewizija RBB wusyła Łužycu jutře, sobotu, w 13.35 hodź. Wospjetowanje na samsnym sćelaku slěduje srjedu, 24. nowembra w 1.45 hodź. W mediatece RBB spřistupnja magacin wot zajutřišeho cyłe lěto, a to kóždy čas.
Lawreataj w portreće
Hłowne ćežišćo přichodneho hornjoserbskeho telewizijneho magacina Wuhladko budźe lětuše spožčenje Myta Ćišinskeho. Srjedź oktobra bu najwyše serbske wuznamjenjenje Trudli a Janej Malinkec přiznate. Wuhladko wěnuje jimaj wosebity portret. Nimo toho wuswětla telewiznicy – dźensa skerje snadne – serbske žiwjenje w regionje mjez Worcynom, Njechornjom a Wósporkom, woprašujo so tam skutkowacu bywšu wučerku a prócowarku Róžu Pinkawinu. Stawizniski wobłuk magacina zaběra so ze „šerjenjom Łužicy“, kaž złóstnikej Frankej Schmökelej před 21 lětami rěkachu, a kak sta policistow (spočatnje podarmo) za nim pytachu. Dalši přinošk wotbłyšćuje „wulku wutrajnosć młodeju Serbow“, kotrajž běštaj so na tak mjenowanym mamutowym běhu wobdźěliłoj a sto kilometrow dołhu čaru Berlin – Podstupim – Berlin w 24 hodźinach wuspěšnje zmištrowałoj.
Telewizija MDR wusyła Wuhladko sobotu, 6. nowembra, w 11.45 hodź. Wospjetowanje na samsnym sćelaku slěduje póndźelu, 8. nowembra w 6.10 hodź. Telewizija RBB pokaza magacin sobotu, 13. nowembra w 13.30 hodź. Nimo toho spřistupnja wusyłanje kóždy čas w mediatece ARD.
„Domjace wopyty“
Mustwo delnjoserbskeho telewizijneho magacina Łužyca wokoło moderatora Christiana Matthéeja poda so z oktoberskim wudaćom na „Domjace wopyty“. Dohromady sydom hosćićelow, kotřiž we Łužicy bydla, abo wottam pochadźeja, wotewrje swoje durje a dowola přihladowarjam dohlad do swojeho wšědneho dnja. Mjez druhim portretuja telewiznicy Jensa Martina z Bórka, kiž předstaji swoje kubło scomter typiskej błótowskej chěžu, kotruž chce na kóždy pad zachować.
Tworjaca wuměłča a spěwytwórča Marion Kwicojc, kotraž je swoju domiznu před něhdźe 30 lětami wopušćiła, zo by w Lipsku na molerstwo studowała a so naposledk tam zadomiła, pokaza zajimcam zajimawostki twarjenja, do kotrehož je zaćahnyła a hdźež jeje wobrazy nastawaja. W Drježdźanach wita Juliana Kaulfürstowa publikum a powěda, kak so za wozrodźenje Slepjanskeje serbšćiny zasadźa. Dale wopytaja telewiznicy nic mjenje zajimawych a fascinowacych wobydlerjow w Limbarku (Gołkojce), Lubnjowje, Choćebuzu a Podstupimje.
Jubilej, wólby a opera
Oktoberske wusyłanje telewizijneho magacina Wuhladko wuswětla z hłownym přinoškom stawizny a skutkowanje Załožby za serbski lud, kotraž bu před 30 lětami załožena. Dalše ćežišćo je wobšěrna rozprawa wo prapremjerje serbskeje pop-opery „Carpe noctem – Njeskónčna nóc“ w Chrósćicach. Nimo toho wěnuja so lětušemu wubědźowanju towarstwa Pawk „PowerSerb“. W studiju z hosćom budźe Elias Bětka, kiž wo swojej mjeztym zakónčenej ekspediciji do wjelhorinow Pamira a Tienšana powěda. A wězo su tež njedawno wotměte wólby do zwjazkoweho sejma tema aktualneho wusyłanja. Wuhladko zjima wuslědki z łužiskeho wida a sposrědkuje reakcije wosobinow serbskeho zjawneho žiwjenja.
Telewizija MDR wusyła Wuhladko sobotu, 2. oktobra, w 11.45 hodź. Wospjetowanje na samsnym sćelaku slěduje póndźelu, 4. oktobra, w 6.10 hodź. Telewizija RBB pokaza oktoberske wudaće sobotu, 9. oktobra, w 13.30 hodź.
